Хайртай ханиа цаг бусаар алдаж, таван хүүхэдтэйгээ өнчирч хоцорсон иргэн Б.Отгонбаяр монголчуудынхаа хандив тусламж дэмжлэгээр Нисэхэд цоо шинэ 4 өрөө байртай болсон билээ. Тэгвэл яг одоо шинэ байрных нь түлхүүрийг найзууд нь гардуулж өгч азжаргал ерөөлөө. Хоёр ихэр нярайтай, 3-12 насны нийт таван хүүхэдтэйгээ гэрт зутруухан амьдарч байсан түүнд Монголчууд нэг өдрийн дотор хандив цуглуулж 430 гаруй сая төгрөг цугларсан байна.
Ийнхүү ямартаа ч тохь тухтай дулаахан гэртэй болж, анхдагч амьжиргаа, хэрэгцээ нь түмэн олны буянаар бүрэн дүүрэн бүтлээ. Шинэ байртай болсон Б.Отгонбаяр "Үнэхээр их баярлаж байна, сэтгэл дэвтэж байна. Хэлэх үг олдохгүй тулгамдаад байна" гэлээ. Харин найзууд нь ард түмнийхээ өгсөн бүх мөнгийг эргээд тайлагнаж танилцуулж тайлбар хийх болно. Асар олон хүний хөдөлмөр сэтгэл шингэсэн юм шүү. Хоёр нярайг хоёр нас хүртэл харах асрагчтай болж байгаа. Мөн живхээр сүүгээр байнга хангах байгууллага ч гарч ирсэнд баярласан. Маш олон байгууллага, хувь хүн, иргэн аж ахуйн нэгжүүд миний найз болон таван сайхан үрд нь тусалсан. Хэр бараг хүнд ирэхээргүй их тусламж ирсэн учраас баярлалаа гэж хэлье. Олныхоо дэм тус хүч дэмжлэг ташуур болж, эрүүл байж, энх мөнх жаргах болтугай.
