Сумдын сургууль, цэцэрлэг, дотуур байрны ариун цэврийн байгууламжийг бүрэн шинэчлэх ажил 2021 оноос эхэлсэн. УИХ-аас эхний ээлжинд 100 тэрбум төгрөг шийдэж өгсөн бөгөөд өнгөрсөн жил мөн 60 тэрбум төгрөгийг нэмэлтээр шийдсэн юм. Гэвч энэ ажлын хэрэгжилт хангалтгүй байгаа талаар УИХ-ын Боловсрол, соёл, шинжлэх ухаан, спортын байнгын хорооны хурлын үеэр хэлэлцлээ.
УИХ-ын гишүүн Б.Баярсайхан: Засгийн газрын 2023 оны тогтоолоор сургууль, цэцэрлэг, дотуур байрыг стандартын шаардлага хангасан ариун цэврийн байгууламжаар хангах төсөл арга хэмжээний ажлыг эрчимжүүлж, 2024 оны эхний хагаст багтаан дуусга гэсэн чиглэлийн БШУ-ы сайд Б.Энх-Амгаланд өгсөн. Энэ асуудал ямар түвшинд явна вэ. Мөн УИХ өөрийн бүрэн эрхийн хүрээнд 100 тэрбум төгрөг дээр ахиад 60 тэрбум төгрөгийн санхүүжилтийг шийдэж өгсөн. Мөн Монгол Улсын 220 сумын эмнэлэг гадаа бие засах газартай байгаа. Тэгэхээр сумын сургууль, цэцэрлэг, дотуур байрны ариун цэврийн байгууламжийн асуудлыг шийдэхдээ эмнэлгийнхээ байгууламжийг шийдэх боломжтой юу?
БШУ-ны сайд Л.Энх-Амгалан “ Монголын 330 сумын нийт 820 гаруй сургууль, цэцэрлэг, дотуур байрын ариун цэврийн байгууламжийг шинэчлэх ажлын хэрэгжилтийн явцад үнэхээр хүндрэлтэй зүйл нэг биш байгаа. Гэхдээ шалтаг тоочихгүй. Бидний хувьд ямар ч байсан 2024 оны 9 дүгээр сарын 1 гэхэд бүх сургууль, цэцэрлэг, дотуур байрныхаа ариун цэврийн байгууламжийг бүрэн ашиглалтад оруулах боломж бий гэдгийг хариуцлагатайгаар хэлье.
Суман дээр байгаа эмнэлгүүдийг ариун цэврийн байгууламжийг шинэчлэх асуудлын хувьд 2022 онд Эрүүл мэндийн сайдын багцад 60-70 тэрбум төгрөг тавигдсан байсан. Гэхдээ хэрэгжээгүй. Азийн хөгжлийн банкны санхүүжилтээр 50-70 сумыг нэгдсэн дэд бүтэцтэй болгох судалгаа нь хийгдээд төсөл эхлүүлсэн нь өнөөдөр хэрэгжиж байгаа гэж ойлгосон. Тэгэхээр бидний хувьд санхүүжилт нь шийдэгдвэл ойрхон байгаа эмнэлгүүдийг техникийн хувьд холбох асуудалгүй байх. Манай яамны зүгээс өөрсдийнхөө хариуцсан ажлыг цаг хугацаанд нь дуусгахаар л ажиллаж байна гэв.
Мөн ТБОНӨБАҮХАТ хуулийн дагуу ариун цэврийн байгууламжтай холбоотой үнэлгээний хороо Боловсролын ерөнхий газар дээр байгуулсан. Эхний 100 тэрбум төгрөгийн тендерийг зарласан. Нэмэлтээр батлагдсан 60 тэрбумын хувьд худалдан авалтаа эхнээс нь зарлаад ажиллаж байна. Одоогийн байдлаар ямар нэгэн гомдол алга гэсэн мэдээллийг БШУ-наас өглөө.
