Нүүрсний гэх тодотголтой 11 хүнд холбогдох шүүх хурлыг анхан шатны шүүх хоёр дахь өдрөө хаалттайгаар шүүж байна. Шүүгдэж байгаа хүмүүсийн дунд УИХ-ын гишүүн асан Т.Аюурсайхан, Эрдэнэс тавантолгойн ХК-ийн захирал асан Б.Ганхуяг гэсэн хүмүүсийн нэр байгаад байгаа. Тэгвэл эдгээр 11 хүн дотор Говийн ноён хутагт Данзанравжаагийн хойд дүр болох есдүгээр ноён хутаг О.Данзанлувсантүдэв буюу О.Угтахбаяр нэр холбогдсон шүүгдэж байгаа ажээ.
Түүнд Эрүүгийн хуулийн тусгай ангийн 22.1 дүгээр зүйлийн 1, 2 дахь хэсэг /Эрх мэдэл, албан тушаалын байдлаа урвуулан ашиглах/, 22.4 дүгээр зүйлийн 2, 4 дэх хэсэг /Нийтийн албан тушаалтан хахууль авах/, 21.2 дугаар зүйлийн 1 дэх хэсэг /Худал мэдүүлэх/, 20.3 дугаар зүйлийн 1, 3 дахь хэсэг /Зохион байгуулалттай гэмт бүлэг байгуулах, түүнд элсэх/, 22.10 дугаар зүйлийн 1, 2 дахь хэсэг /Үндэслэлгүйгээр хөрөнгөжих/, 22.5 дугаар зүйлийн 1 дэх хэсэг /Хахууль өгөх/, 18.6 дугаар зүйлийн 1 дэх хэсэгт /Мөнгө угаах/ тус тус заасан гэмт хэрэгт холбогдуулан эрүүгийн хэрэг үүсгэн шалгасан юм байна. Харин энэ удаад шүүгдэгчийн өмгөөлөгчийн хүсэлтээр шүүх хурлыг хаалттай явуулж байгаа аж.
Хавтаст хэргийн танилцуулгыг харахад 1984 оны наймдугаар сарын 15-нд Дорноговь аймагт төрсөн. Дээд боловсролтой. Шашны зан үйл судлаач мэргэжилтэй. Хамарын хийдийн лам. Хан-Уул дүүрэгт оршин суудаг. Өмнө нь ял шийтгэл эдэлж байгаагүй ажээ.
Тэрбээр Говийн ноён хутагтын ес дэх дүрээр тодорсон тул түүнийг сэнтийд нь залах ёслол 2013 оны дөрөвдүгээр сарын 28-ны өдөр Хамарын хийдэд болж байжээ. Түүний нэрийг Отгоннамжилын Угтахбаяр гэдэг бол номын нэрийг нь Данзанлувсантүдэв гэдэг аж. Тэгвэл говийн ноён догшин хутагт Данзанравжаагийн хойд дүрээр заларч, ном буяны ажилд шамдаж байх ёстой лам хүн хэдэн их наяд төгрөгийн нүүрсний хэрэгт холбогдон шүүхийн хаалга татаж, шүүгдэж байгаа нь хэр зөв зохистой үйлдэл вэ.
