Иран улс өчигдөр буюу Мягмар гарагт Пакистан улсын нутаг дэвсгэрт үүрлэсэн зэвсэгт байгууллагын баазад агаараас довтолсон байна.

Ингэснээр Хамас-Израилийн дайнаас үүдэлтэй Ойрх Дорнодын мөргөлдөөн өргөжих эрсдэл улам нэмэгдлээ.

Ираны төв хэвлэл тус улсын хувьсгалт гвардын анги Пакистаны нутаг дэвсгэрт байрлаж буй суннит исламын урсгалыг дагагч Жайш аль-Адл зэвсэгт байгууллагын баазад пуужин болон дроноор довтолсон тухай мэдээлжээ.

“Шударга ёсны Арми” гэх утга бүхий нэртэй энэ байгууллага 2012 онд байгуулагдсан бөгөөд Пакистаны хил орчмын нутагт үйл ажиллагаа явуулдаг юм. Өмнө нь тус бүлэг Ираны хил хамгаалагчдад халдаж, барьцаалж байсан түүхтэй.

Уг ажиллагаа нь энэ сарын эхээр Иранд болсон амиа золиослогчийн халдлагын хариу арга хэмжээ юм байна. 90 гаруй хүний амийг хөнөөсөн энэ халдлагыг Исламын Улс бүлэг үйлдсэнээ хүлээсэн юм.

Өмнөх өдөр нь Ираны арми бас Ирак, Сири дэх суннит исламын зэвсэгт бүлэглэлүүдэд агаараас цохилт өгсөн байна.

Тегераны эрх баригчид өмнө нь Пакистаны хил орчмын нутагт зэвсэгт бүлэглэлүүдтэй тулалдаж байсан ч агаарын ажиллагаа огт явуулж байгаагүй юм.

Ажиллагааны үеэр хоёр хүүхэд алагдаж, гурван охин шархадсан тухай Пакистаны тал мэдээлжээ.

Мөн Пакистаны гадаад хэргийн яам Ираны агаарын ажиллагааг хатуу шүүмжилсэн мэдэгдэл гаргасан байна.

“Иран улс ямар ч үндэслэлгүйгээр агаарын хилд нэвтэрч, гэм зэмгүй хоёр хүүхдийн амийг хөнөөж, гурван охиныг шархдуулсан явдлыг Пакистан улс эрс буруушааж байна. Пакистан улсын газар нутгийн бүрэн бүтэн байдалд халдсан явдлыг огт хүлээн зөвшөөрөхгүй бөгөөд ноцтой үр дагаварт хүргэж болзошгүйг анхааруулж байна” гэж уг мэдэгдэлд өгүүлжээ.

“Терроризм бол бүс нутгийн бүх улс орнуудын нийтлэг аюул занал тул харилцан уялдаатай арга хэмжээ авах ёстойг Пакистан улс үргэлж сануулсаар ирсэн. Ийм нэг талт үйлдэл нь сайн хөршийн харилцаанд нийцэхгүй бөгөөд хоёр талын харилцан итгэлцлийг ноцтой алдагдуулж болзошгүй юм” гэж цааш нь өгүүлсэн байна.

Пакистаны албаны эх сурвалжийн мэдээлснээр Ираны агаарын цохилтод тус улсын Балучистан мужийн Панжгур дүүрэг дэх исламын хийд өртжээ. Уг хийд нь Ираны хилээс 50 км зайтай оршдог юм байна.

Балучистан бол сүүлийн 20 гаруй жил үргэлжилж буй балучи үндэстний салан тусгаарлах хөдөлгөөний төв юм.

Салан тусгаарлагчид эхэндээ бүс нутгийн байгалийн баялгийг төв засгийн газартай хуваалцах хүсэлтэй байсан бол сүүлдээ тусгаар тогтнол шаарддаг болжээ.

Балучи үндэстэн Пакистан, Иран, Афганистан гурван улсын нутаг дэвсгэрт хуваагдан амьдардаг.

Тегераны дэглэм олон жилийн өмнөөс суннит исламын зэвсэгт бүлэглэлүүдийг нутаг дэвсгэртээ үүрлүүлдэг хэмээн Пакистан улсыг буруутгасаар ирсэн. Ингэхдээ үүнийг бүс нутгийн гол өрсөлдөгч Саудын Арабын захиалга байж болзошгүй гэж сэжиглэдэг байв.

Өнгөрсөн оны гуравдугаар сард Хятад улсын зуучлалаар Иран, Саудын Араб улсууд сөргөлдөөнөө намжаах тохиролцоонд хүрсэн юм.

Даваа гарагийн орой Ираны зүгээс Сирийн хойд нутаг дахь Исламын Улс бүлэглэлийн байрлалд, бас Иракийн Ирбил хот дахь АНУ-ын консулын байрны ойролцоо “Израилийн тагнуулын төв” гэж өөрсдийн нэрлэсэн байгууламжид пуужингаар довтолжээ.

Өчигдөр Иракийн засгийн газар нутаг дэвсгэрт нь халдаж, хэд хэдэн иргэнийх нь амийг бүрэлгэсэн Иран улсын эрх баригчдыг хатуу шүүмжилж, Тегеран дахь элчин сайдаа эгүүлэн татсан юм.

Эх сурвалж: Associated Press