Өнгөрсөн 2022 оны улсын баяр наадмаар ес даван үзүүрлэж, Улсын арслан хэмээх хүндтэй цол хүртсэн Б.Орхонбаяр сүүлийн үед заал танхимын барилдаанд барилдахаа болив. Барилдахгүй байгаа шалтгаан нь бэртэл гэмтэл гэх мэдээлэл байна. Түүний дэмжигчид болон бөхийн хорхойтнууд аатай авхаалжтай хурдтай сийрэг барилддаг залуу арслангаа барилдахыг нь харж байгаа. Одоо цагаан сарын барилдаанд барилдах болов уу гэсэн хүлээлт горьдлого байгааг нуух юун.
Улсын арслан цолонд хүрэхдээ хорт зуршлаас хол байж энэ цолонд хүрсэн хэмээн ярих дуртай тэрбээр Сэлэнгэ аймгийн Цагааннуур суманд 1998 оны долоодугаар сарын 1-нд төрсөн. "Боохой" хэмээх улсын арслан Д.Данзангийн өлгий нутгийн хүчтэн тэрбээр “Таван хан” дэвжээ, “Хос түрүү” компанийн бөх гэж явдаг.
Тэрбээр "Монгол Улсын арслан хэмээх эрхэм хүндтэй цолыг хүртэхэд минь гол нөлөөлсөн хүчин зүйл гэвэл хорт зуршлаас хол байсан. Мөрөөдлийнхөө араас хөдөлмөрлөсөн. Тиймээс залуус маань спортоор хичээллэж, шинэ үеийн залуус маань хорт зуршлаас хол байгаарай" гэж зөвлөжээ.
Тухайлбал, Б.Орхонбаяр 2019 онд Төрийн наадамд 21 насандаа анх удаа барилдахдаа Улсын начин цол хүртэн, монгол түмнээ баярлуулсан. Түүний амжилтыг өмнө нь дархан аварга Д.Дамдин, Х.Баянмөнх, Б.Бат-Эрдэнэ, улсын арслан Ө.Эрдэнэ-Очир, улсын гарьд Ж.Бат-Эрдэнэ тэргүүтэй наймхан бөх үзүүлж байжээ. Тэрбээр 2019 онд улсын начин болсон хамгийн залуу хүчтэн. Улмаар тухайн жил начин болсон хамгийн залуу бөхөд олгодог дааганы эзэн болов. Мөн 2020 улсын наадамд барилдахдаа зургаагийн даваанд шинээр Улсын харцага болсон Б.Бат-Оршиход өвдөг шороодсон. Улмаар Б.Бат-Оршихоос допинг илэрсэн тул 2021 онд түүнд улсын харцага цол нөхөж олгосон юм.
Харин Б.Орхонбаяр нь 2022 оны Ардын хувьсгалын 100, 101 жилийн ойгоор Ц.Содномдорж арслангаар 7 давж Улсын заан, Улсын заан Б.Бат-Өлзийгөөр 8 давж Улсын гарьд, Улсын даян аварга Н.Батсууриар 9 давж улсын арслан цол хүртсэнамжилттай билээ.
