ОХУ-ын холбооны субъектүүдийн нэг Башкортостанд өчигдөр олон мянган иргэд оролцсон эсэргүүцлийн жагсаал болсныг цагдаа нар хүч хэрэглэн тараажээ.
Башкортостаны алслагдсан хот Баймакт цугларсан иргэд башкир үндэстний хэл соёлыг хамгаалах хөдөлгөөний идэвхтэн Фаиль Алсыновт шүүхээс оноосон дөрвөн жилийн хорих ялыг эсэргүүцсэн юм.
Алсынов 2023 оны хавар башкируудын ариун шүтээнд тооцогддог ууланд алтны олборлолт явуулахыг эсэргүүцсэн арга хэмжээнд үг хэлж байжээ. Шүүх түүнийг үндэс угсаагаар ялгаварласан утгатай зүйл олон нийтийн өмнө ярьсан шалтгаанаар ял оноосон байна.
Түүний тэргүүлдэг Башкорт хөдөлгөөнийг 2020 онд экстремист байгууллагаар зарлаж, үйл ажиллагааг нь хориглож байжээ.
Цагдаа нар жагсагчидтай мөргөлдөх үеэр нулимс асгаруулагч хий, бороохой, анхаарал сарниулагч гар бөмбөг зэрэг зэвсэг ашигласан байна.
Энэ үеэр 20 орчим хүн баривчлагдсаныг OVD-Info хүний эрхийн байгууллага мэдээлсэн юм. Башкортостаны дотоод хэргийн яам жагсаалыг “хууль бус, зөвшөөрөлгүй арга хэмжээ” хэмээн нэрлэж, нийтийг хамарсан үймээн самуунд турхирч, цагдаагийн биед халдсан этгээдүүдийг шалгаж эхэлснээ Оросын холбооны мөрдөн байцаах хороо мэдэгджээ.
Жагсаалын үеэр иргэд хоолой нийлүүлэн “Эрх чөлөө” хэмээн хашхиралдаж, Башкортостаны туг далбааг барьж, цагдаа нарт эсэргүүцэл үзүүлж байсан байна.
Энэ үеэр эрх баригчид интернэт холболтыг хязгаарласан тухай гэрчүүд мэдээлжээ.
Башкортостанд болсон энэ жагсаал нь Украины дайн эхэлсэн цагаас хойш ОХУ-д гарсан хамгийн том эсэргүүцлийн ажиллагаануудын нэг болж байна. Башкирууд нь Европ, Азийн газар зүйн хил болох Уралын нурууны ойролцоо оршин суудаг түрэг гаралтай үндэстний цөөнх юм.
Эх сурвалж: CNN, The Guardian
