Боловсролын зээлийн сангийн Ажлын албаны даргын албан үүргийн түр орлон гүйцэтгэгч Б.Амарсанаа Боловсролын зээлийн санд зээлээ төлж дуусааүйн улмаас хадгалагдаж байгаа 13264 дипломын эздэд хандан “ хэн нэгний боломжоос хойш таталгүйгээр хариуцлагаа ухамсарлана уу” хэмээн хүссэн байна.
Тэрээр “Боловсролын Зээлийн сан нь дотоодын их дээд сургуульд суралцагчдын хөнгөлөлттэй зээлийн хөтөлбөрийг 1993-2016 он хүртэл хэрэгжүүлэн зээл олгож байжээ. Мэдээж тухайн зээл нь гаргасан хууль тогтоомж дүрмийн дагуу тодорхой нөхцөл, шалгуураа хангасан хүмүүст олгогдсон байна. Гэтэл нөгөө зээл нь одоог хүртэл бүрэн төлөгдөж дуусаагүйгээс гадна барьцаа болох 13,264 диплом манайд хадгалагдаж байна. Тус зээл нь нийт мөнгөн дүнгээр 14.6 тэрбум төгрөгтэй дүйцэж байна. Барьцаанд тавьсан хамгийн хуучин диплом нь 1998 онд хамаарагдана. Тиймээс одоо энэ барьцаанд байгаа дипломын эзэд нь харж байвал төлбөрөө төлөн, дипломоо буцааж аван өр төлбөрөө барагдуулна уу. Нэгэн цагт та бүхэн улсаасаа зээл аваад өөрсдийн амьдрал ахуйгаа дээшлүүлэх алхмаа эхлүүлсэн бол одоо яг энэ санхүүжилт дутагдаж байгаа хэн нэгний боломжоос хойш таталгүйгээр хариуцлагаа ухамсарлана уу” хэмээн бичсэн байна.
