Ардчилсан намаас өнөөдөр Ногоон автобусны хянан шалгах түр хороо байгуулагдсан талаар байр сууриа илэрхийллээ. Тус намын Хэрэг эрхлэх газрын дарга Н.Лхагвадорж "Монгол Улс найман жилийн хугацаанд авлигал хээл хахууль, хулгайгаа ярьсаар хөгжсөнгүй, харин ч хойшоо ухарлаа. Үүнтэй холбоотой хэд хэдэн тоо баримтыг хэзээ ч битгий мартаарай ээлжит хэвлэлийн бага хурлаараа байнга сануулж байгаа. ЖДҮС-ийн хэрэгт 49 хүнийг хулгайтай холбогдуулан шалгасан. 96 тэрбум төгрөгийн хулгайд өнөөдөр хэн хариуцлага хүлээсэн бэ.
Нүүрсний 40 их наядын хулгай байгаа. АН-аас шахаж сонсгол явуулсан. Гэтэл ганц нэг гар хөлийнхөө хүмүүсийг шалгуулсан. Хөгжлийн банкны хулгайгаас хэн хариуцлага хүлээсэн бэ. Хэн ч хариуцлага хүлээгүй. Ковидын үеийн хулгайд бас хэн ч хариуцлага хүлээгээгүй өнгөрсөн байна. Ингэж л ард түмнийг доромжилж байна.
Ард түмнийг улныхан гэж доромжилсон эмэгтэй энэ их хулгайгаар хариуцлага хүлээсэн үү. Үүний ард хэн байна вэ. Дараагийн хулгай ногоон автобусны хулгай байна. Нэг нам хэт олон сонгуульд удаа дараа олонхи болоод улсаа яаж дампууруулдаг вэ гэдгийг өнгөрсөн 8 жилийн хугацаанд харлаа. 328 тэрбум төгрөгөөр хуучин автобусыг худалдаж авчраад түүнийг шахах гэж байгаад баригдсан. Энэ талаар нээлттэй сонсгол хийхийг шаардаж байгаа. Мөн нүүрс, утааны асуудал хөндөгдөж байна. Гэтэл утаа ямар хэмжээнд байна. Харамсалтай нь азжаргалтай Улаанбаатар нь улсынхаа нэрийг доош нь унагаж байгаа шүү. Хорт хавдар, хорт утааны уршгаар хүн бүр өвдөж байна. Өнгөрсөн найман жилийг товчхон хэлбэл хөгжил нь хойшоо ухарсан нийгэмд хар толбо үлдээсэн жилүүдийг эрх баригчид үлдээлээ гэж дүгнэж байна" гэлээ.