Хойд Солонгосын өсвөр насны хоёр хүүг К-драм үзсэнийх нь төлөө эрх баригчдын зүгээс 12 жилийн турш хүнд ажил хийлгэх ялаар шийтгэсэн байна.
ВВС-гийн олж авсан бичлэгт 16 настай хоёр хүүг цэнгэлдэх хүрээлэнд хэдэн зуун залуусын өмнө гавлаж, “алдаагаа гүнээ эргэцүүлээгүй” хэмээн офицерууд зэмлэж байгаа тухай гарч буй аж.
Хойд Солонгост Өмнөдийн дуу хөгжим тэр дундаа киног үзэхийг хориглодог. Гэвч залуусын хувьд хатуу шийтгэл хүлээхийг мэддэг ч К-драмыг үзэх хүсэл сонирхлоо хорьж дийлдэггүй. БНАСАУ-аас тус улсад бол буй аливаа үйл явдлын гэрэл зураг, видео бичлэгийг гадаад ертөнцөд дамжуулахыг хориглодог тул энэ бичлэг олон улсын мэдээллийн агентлагт их урт замыг туулж хүрсэн нь ойлгомжтой. Бичлэгийг Хойд нутгаас урвасан хүмүүстэй ажилладаг “Өмнөд ба Хойд хөгжил” нэртэй байгууллагаас BBC-д өгсөн аж. Уг бичлэгийг Хойд Солонгост иргэдэд анхааруулга болгох зорилгоор тараасан байна. Мэдээнд “ Ялзарсан утсан хүүхэлдэйн дэглэмийн соёл өсвөр насныхан хүртэл тархаж байна. Тэд дөнгөж 16 настай ч өөрсдийн ирээдүйг сүйрүүлсэн” хэмээн дурджээ.
Цэргийнхэн хөвгүүдийн нэр хаягийг ч дурдсан байна. Өмнө нь, Хойдод яг ийм байдлаар хууль зөрчсөн хүүхдүүдийг торны цаана суулгахаас илүүтэйгээр залуучуудын хөдөлмөрийн лагерьт таван жилээс бага хугацаагаар хөдөлмөр эрхлүүлэхээр шийтгэдэг байв. Харин насанд хүрэгсдийг Өмнөд Солонгосын соёлын бүтээгдэхүүнийг үзсэн, түгээсэн тохиолдолд 2020 оноос цаазаар авах хууль баталсан байна.
Хойд Солонгосын нэгэн дүрвэгч BBC-д ярилцлага өгөхдөө “ Өмнөд Солонгосын хөгжим сонссон, Өмнөдийн киног найздаа үзүүлсэн” хэмээн буруутган 22 насатай залууг буудаж хөнөөхийг өөрийн нүдээр харсан хэмээн ярьжээ. Өмнөд Солонгосын соёлыг бишрэх нь олон жилийн хаанчлал тогтоосон Кимийн тогтолцоог сулруулахад хүргэж болзошгүй гэх болгоомжлол ийм хатуу ял шийтгэлийн бодлого баримтлахад хүргэдэг байх хэмээн “Өмнөд ба Хойд хөгжил” байгууллагын тэргүүн Чой Кен Хуй ярьжээ.
Өмнөд Солонгосын зүгээс 2000-д оны үед Хойд Солонгост эдийн засаг хүмүүнлэгийн тусламжийг ямар нэгэн болзолгүйгээр үзүүлж байхад л Өмнөдын соёлын зарим бүтээгдэхүүнтэй Хойдын иргэд танилцаж эхэлсэн аж. Гэвч 2010 онд Өмнөдөөс энэхүү тусламжийн арга хэмжээ нь Хойд Солонгосын жирийн иргэдэд хүрэхгүй, эрх баригчдын улстөрийн бодлогод ч эерэг өөрчлөлт гарахгүй байна гэж үзсэн учраас зогсоосон байдаг.
Гэвч Өмнөдийн соёлын бүтээгдэхүүнүүд Хятадаар дамжин Хойд Солонгост хүрсээр байсан аж.
Хойд Солонгосын дүрвэгч “BBC Korean”-д өчигдөр “ Хэрвээ Америкийн кино үзэж байгаад баригдвал хахууль өгөөд мултарч болно. Харин Солонгос жүжиг үзсэн бол буудуулна. Хойд Солонгосын иргэдийн хувьд Өмнөдийн драм үзэх нь өөрсдийн хэцүү амьдралаа мартахад тусладаг “хар тамхи” болдог” гэж ярьжээ.
Эх сурвалж: BBC
