Архангай аймгийн ИТХ-ын дарга Б.Батжаргалын хууль бус асуудлаар тус аймгийн ИТХ-ын төлөөлөгч Ц.Амаржаргал болон ШИНЭ намаас өнөөдөр хэвлэлийнхэнд мэдээлэл хийлээ.
ИТХ-ын төлөөлөгч Ц.Амаржаргал "Аймгийн ИТХ-ын дарга гэдэг бол төрийн өндөр албан тушаалтан, өндөр ёс суртахуунтай, сахилга баттай ажиллах хариуцлагатай албан тушаалтан байх ёстой. Шударга ёс, тэгш байдал, эрх чөлөө, үндэсний эв нэгдлийг хангаж, хууль дээдлэх үндсэн зарчмаар ажиллах ёстой байтал Б.Батжаргал хуулийг гууль болгож, өөрийн эрх ашигт нийцүүлэн, ашиглаж байна. Ингэснээр аймгийн ИТХ байгууллага шиг байгууллага биш чадамжгүй болж хувираад байна. Сум багт ИТХ гэдэг жинхэнэ улстөрийн намтай холбоотой улстөрждөг болсон.
Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд иргэдийн нийтийн хурал болон аймгийн ИТХ-ыг улиралд нэг удаа хуралдуулна гэж заасан байдаг. Гэтэл энэ хүн өөрт ашигтай үед хурлаа товлон зарлаж, ашиггүй бол хуралдуулдаггүй. Өөрт нь ашиггүй хурлыг хууль бусаар хойшлуулаад, алга болчихдог. Сүүлийн хуралдааныг гэхэд хаяж яваад, одоо болтол хурал нь нээлттэй хаагаагүй байна.
Хамгийн ноцтой аймгийн ИТХ-ын дэргэд тодорхой төсөв хөрөнгөтэй Гэмт хэрэг, зөрчлөөс урьдчилан сэргийлэх салбар зөвлөл байдаг. Энэ төсөв хөрөнгө торгуулийн орлогоос бүрддэг. Гэтэл ИТХ-ын дарга Б.Батжаргал энэ хөрөнгийг хууль бусаар зарцуулж, хувьдаа шамшигдуулж, үрэн таран хийсэн нь тогтоогдсон.
Б.Батжаргал нь аймгийн малчдын малын хулгайгаас сэргийлэх, таслан зогсоох энэ зардлыг ИТХ-ын дарга идчихсэн шүү. Бусад гэмт хэрэгт зориулах ёстой зардлыг бүлэглээд хууль бусаар идчихсэн. Архангай аймгийн иргэдийн төлсөн торгуулийн тодорхой хувийг гэмт хэргээс сэргийлэхэд зарцуулах ёстой байтал ИТХ-ын дарга бүлэглэн шамшигдуулж, хууль бусаар зарцуулсан. Энэ хүн төрийн өндөр албан тушаалтан, улс төрийн нөлөө бүхий этгээд. Хариуцлага хүлээх ёстой.
Тиймээс миний бие эрээ цээргүй даргыг огцруулах асуудлыг аймгийн ИТХ-д өргөн барьсан. Харамсалтай нь Архангай аймгийн ИТХ дахь АН-ын бүлэг хулгайчаа хамгаалж, хурлаа хаяж яваад, одоо болтол асуудлыг хэлэлцэхгүй байна. Нэг хулгайчийн эрх ашиг чухал уу, нийтийн ард түмний эрх ашиг чухал уу” гэлээ.
