Хүн амын тоогоор ОХУ-д гуравт ордог Новосибирск хотод Баасан гарагт халаалтын шугамд гарсан хэд хэдэн эвдрэл гэмтэлтэй холбогдуулан онц байдал зарлажээ.
“Харамсалтай нь халаалтын системд эвдрэл гэмтэл гарсны улмаас нөхцөл байдал улам муудлаа” гэж Новосибирск мужийн захирагч Андрей Травников өөрийн Телеграм хуудсанд бичсэн байна.
t.me/TravnikovAndrey /797
Сүүлийн 24 цагийн хугацаанд тус хотын нэг дүүргийн дулааны шугамын гурван хэсэг задарсныг тэр энэ үеэр мэдээлжээ.
Халаалтын тасалдалд бухимдсан оршин суугчид өнөөдөр буюу Бямба гарагт гудамж талбайд эсэргүүцлийн арга хэмжээ зохион байгуулах гэж байсныг хотын захиргаа хориглосон байна.
Өнгөрсөн долоо хоногт энэ хотын газар доогуурх дулааны шугам хагарснаас олон зуун айл өрх халаалтгүй болж, гудамж талбай халуун усаар үерлэж байв.
Томоохон гэмт хэргүүдийг хариуцдаг ОХУ-ын Мөрдөн Байцаах Хороо энэхүү гэмтэлд аюулгүй байдлын стандартыг зөрчсөн үйлдэл нөлөөлсөн эсэхийг шалгаж тогтоохоор ажиллаж байгаа.
Новосибирскийн халаалтыг хариуцдаг Сибирийн Эрчим Хүчний компанийн мэдээлснээр хагарсан шугамыг 1974 онд байгуулж байжээ.
Хотын захиргаа гэмтлийг засварлахаар хүн хүч, машин техник нэмж дайчилснаа мэдэгдсэн ч халаалт хэзээ сэргэх талаар хугацаа хэлээгүй байна.
Сүүлийн өдрүүдэд Новосибирск хотод агаарын температур Цельсийн -20-оос -30 хэмийн хооронд хэлбэлзэж байгаа юм.
Шинэ оны эхний өдрөөс хойш ОХУ-ын олон хотуудад дулааны шугамын гэмтэл дараалан гарч, олон мянган орон сууц халаалтгүй болоод байгаа. Энэ нь Зөвлөлтийн үеийн хуучирсан дэд бүтцүүд элэгдэж эхэлсэнтэй холбоотой гэж мэргэжилтнүүд үзэж байна.
Эх сурвалж: The Moscow Times