Манай улс өнгөрсөн жилд аялал жуулчлалаас гурван их наяд гаруй төгрөгийн орлого олжээ. Ингэхийн тулд мэдээж төр засгаас шат дараатай олон арга хэмжээ авсан. Засгийн газраас 2023-2025 оныг Монголд зочлох жил болгон зарлаж, визний тодорхой нөхцөлүүдийг чөлөөлж, заримыг нь сулруулсан нь ихээхэн түлхэц болсон. Дээрээс нь салбар яамнаас Монголыг олон улсад сурталчилсан эвентүүд зохион байгуулж, дэлхийд танигдсан инфлүүнсерүүдийг урьж авч ирсэн нь дэлхийн аялагчид манайхыг сонирхох хүслийг өдөөсөн. Бид өнгөрсөн хугацаанд эдийн засгаа солонгоруулна, аялал жуулчлалыг хөгжүүлнэ гэж их ярьсан. Гэвч тэр бүр дорвитой ажил хийж байгаагүй нь харамсалтай. Аливаа бодлого шийдвэрийг гаргахдаа уялдаа холбоотой, судалгаа тооцоотой гаргавал амжилттай болдогийг аялал жуулчлал харууллаа. Манай улсад аялал жуулчлалыг хөгжүүлэх хамгийн том суурь нь болсон байгалийн сайхан нь байна. Даанч аялагчдад зүгээр нэг онгон дагшин, хүний хөл хүрээгүй үзэмжит байгалийн сайхан байгаад хангалтгүй. Тэд тав тух, боломжийн үнэ, сайн үйлчилгээ, эелдэг харилцаа, үнэнч байдлыг хүсдэг. Энэ бүхнийг нь цогцлоож чадвал цаашид бид гурваар тогтохгүй, их наядын орлого олох бүрэн боломж байна.
Үүн дээр нэмээд дотоод болон гадаадын аялал жуулчлалыг хөгжүүлэх нэгэн том хөшүүрэг бол дэд бүтэц. Үүнийгээ бид эхнээс нь хийж хэрэгжүүлж л байна. Харамсалтай нь санхүү мөнгөний асуудлаас үүдэн тэр бүр богино хугацаанд шийдэж чадахгүй байгаа нь гачлантай. Саалиа бэлдэхээр саваа бэлд гэдэгчлэн орон нутгуудыг холбосон зам харгуйгаа сайтар барьж, жуулчдын сонирхлыг татах олон арга хэмжээг зохион байгуулах нь чухал. Засгийн газраас энэ оныг “Бүсчилсэн хөгжлийг дэмжих жил” болгон зарласан. Үүний хүрээнд бүс нутгуудыг холбосон авто замууд ч барина гэнэ. Ингэснээр аялал жуулчлалын шинэ бүсүүд бий болох нь гарцаагүй. Харин үүн дээрээ нэмээд төр, хувийн хэвшлийн хамтын ажиллагааг нэмэгдүүлж, хувийн хэвшлийнхний үнэ ханшийн уян бодлого, үйлчилгээний сайтар анхаарах хэрэгтэй. Нэг удаа ахиу орлого олоод дуусах биш, нэг ирсэн жуулчин дахин олон жуулчин дагуулж ирдэг тогтолцоо, хандлагыг бий болгож байж Улсын төсөвт аялал жуулчлалаас төвлөрүүлдэг орлогыг нэмэгдүүлж, энэ салбарт ажлын олон байр нэмэгдүүлж чадна.
Т.Дарханхөвсгөл
Эх сурвалж: Өдрийн сонин
