Засгийн газрын ээлжит хуралдаанаас гарсан шийдвэрийг танилцууллаа.
Хууль зүй, дотоод хэргийн сайд Б.Энхбаяр "Засгийн газрын хуралдаанаар нийслэл хотод үүссэн осолтой холбоотой асуудлыг тойрч өргөн хүрээнд ярилаа.
Ирэх долоо хоногоос эхлээд тэг зогсолт руу орно. Улаанбаатар хотод хороолол, барилга, үйлчилгээний төвүүд хоорондоо ойрхон зайтай шахаж, тулж баригдсан. Үүнийг шийдэхтэй холбоотой тойрог замын асуудал яригдаж байна.
Нийслэл хот маань дарьтай торх болж хувирсан байна. Энэ бүхний уг үндэс нь сүүлийн 20 жилийн газрын авлигын асуудал. Үүнээс болж өнөөдрийн Улаанбаатар хот хэн ч гарч ирээд асуудлыг шийдэх боломжгүй түвшинд тулсан байна. Тиймээс газар олголт, нийтийн тээвэртэй холбоотой асуудлыг зөвхөн Засгийн газрын хүрээнд биш УИХ-ын түвшинд хянан шалгаж, иргэд олон нийтийг мэдээллээр хангах нотлох баримтыг шинжлэн судлах сонсгол зохион байгуулж, Түр хороо байгуулж, миний бие ахалж ажиллах үүрэг чиглэл авлаа.
Ээлжит бус чуулганаар Түр хороог байгуулах асуудал яригдах байх" гэв.
Мөн ХЗДХ-ийн сайд Б.Энхбаяраас Үндэсний цэцэрлэгт хүрээлэн, Дүнжингарав орчмын газрын талаар тодруулахад "Энэ орчмын газрыг хүний өөрийнгүй хэсэгчилж зарсан. Улсын Ерөнхий прокуророосоо эхлээд Тагнуулын байгууллагын удирдлага нь хүртэл энэ газрын наймаанд оролцсон гэх мэдээлэл байдаг. Урьдчилсан байдлаар ийм л зүйл хэлэх байна" хэмээлээ.
