Баянзүрх дүүргийн 26 дугаар хороо Дүнжингарав худалдааны урд зам дээр хий тээвэрлэж явсан машин дэлбэрсэн осол энэ сарын 24-нд гарсан. Энэ осолтой холбоотойгоор “Дашваанжил” ХХК-иас өчигдөр олон нийтэд хандаж мэдээлэл өгөв.
Мэдээллийн эхэнд компанийн зүгээс амиа алдсан аврагчдын ар гэрт эмгэнэл илэрхийлэв. Үргэлжлүүлэн тус компанийн захирал Н.Баатаржав “Манай компанийн жолооч Н.Рэнцэндорж 1984 оноос эхэлж том тэрэг, хүнд машин механизм барьсан. “Онц тээвэрчин” тэмдэгтэй. Архи, тамхи хэрэглэдэггүй 2019 оноос хойш манай компанид ажиллаж байгаа сайн жолооч. Уг осолтой холбоотойгоор хүмүүсийн зовлон дээр дөрөөлж элдэв худал мэдээлэл тарааж байгаа тул иргэд мэдээлэлд шүүлтүүртэй хандаасай гэж хүсч байна. Манай компанийн хувьд Монголдоо анх удаа олон улсын жишигт нийцсэн хийн хангамжийн сүлжээг байгуулж 21 аймаг 30 гаруй суманд хий хадгалах байгууламжийг байгуулсан. Одоогоор манай компанийн 20 гаруй тээврийн хэрэгсэл орон нутаг болон нийслэлд үйл ажиллагаа явуулж тээвэрлэлт хийж байгаа.Хэдий амжилттай үйл ажиллагаа явуулж байсан ч уг осол бидэнд том цочрол өглөө. Маш их харамсаж байна. Бид Монгол Улс болон олон улсын стандартын шаардлага хангасан хамгийн сайн тээврийн хэрэгслийг худалдан авч ашигладаг. Манай компанийн жолооч 2019 онд Шадар сайдын баталсан аюултай ачаа тээвэрлэх маршрутын дагуу стандартын шаардлага хангасан машинаар тээвэрлэлт хийж байсан. Хот дотор тээвэр хийхэд зөвшөөрөл авдаг. Ингэхдээ хуулийн дагуу буюу тодорхой заасан чиглэл, маршрутын дагуу тээвэрлэлт хийдэг. Харин шөнийн цагаар тээвэр хийхдээ дүрмийн дагуу аюултай тээвэрлэлтийг заавал 22:00 цагаас хойш хийх ёстой гэдэг. Үүний дагуу шөнийн цагаар тээвэрлэлт хийж байсан. Мөн осолдсон машин 15.7 тонн хий тээвэрлэж явсан. Жолоочийн хувьд аюултай ачаа тээвэрлэх зөвшөөрөлтэй, бүх стандарт бичиг баримттай байсан. Бид аюулгүй байдлаа сар бүр хянаж, зөвшөөрөл авч тээвэрлэлт хийдэг.
Мөн жолооч нарын дунд хяналт шалгалтын ажиллагааг тогтмол явуулдаг. Хий тархсан тохиолдолд ямар нэг газраас оч үсэрч байж гал гарна гэсэн үг. Галын шалтгаан нөхцөлийг тогтоох шалгалтын ажиллагаа яг одоо явж байгаа тул ослын талаар дэлгэрэнгүй мэдээлэл өгөх боломжгүй” гэлээ. Мөн энэ үеэр тус байгууллагын удирдлагууд болсон асуудалтай холбоотойгоор иргэдээс уучлал хүсч, амь эрсэдсэн албан хаагчдын ар гэрт эмгэнэл илэрхийлэв.
Уг осолтой холбогдуулж хоёр хүнийг 48 цагийн хугацаатайгаар цагдан хорьсон талаар хуулийн байгууллага мэдээлсэн. Тодруулбал, хий тээвэрлэж явсан машины жолооч Н.Рэнцэндорж болон уг машинтай шүргэлцсэн “Ниссан потрал” машины жолооч Э.Мөнхнаран нарыг 24-ний 23:00 цагийн орчимд хуулийнхан саатуулсан юм. Жолооч нарт Эрүүгийн хуулийн 27.10-ын 4.2 буюу Тээврийн хэрэгслийн хөдөлгөөний аюулгүй байдал зөрчсөний улмаас хоёр, түүнээс олон хүний амь нас хохирсон бол тээврийн хэрэгслийг жолоодох эрхийг найман жилээс дээш арван хоёр жил хүртэл хугацаагаар хасч хоёр жилээс найман жил хүртэл хугацаагаар хорих ял шийтгэнэ гэж заасан зүйл ангиар буруутгаж байгааг цагдаагийн байгууллагаас мэдээлсэн.
Тэгвэл эх сурвалжийн хэлж буйгаар жолооч Э.Мөнхнаранг хориогүй гэгдэж байна. Өөрөөр хэлбэл, 24-ний 22:00 цагийн орчимд жолооч Н.Рэнцэндоржийг 48 цагийн хугацаатай саатуулах прокурорын тогтоол шүүхэд ирж, шийдвэрлэжээ. Харин Э.Мөнхнарантай холбоотой саналыг прокурорын байгууллагаас гаргаагүй бололтой.
Зарим хуульчдын зүгээс жолоочийг уг хэрэгт шууд буруутган цагдан хорьсон нь үндэслэлгүй гэж үзэж байв. Тиймээс 48 цагийн хугацаа дууссаны дараа чөлөөлөх ёстой гэсэн байр суурь илэрхийлж байлаа.
Б.ЗАЯА
Эх сурвалж: Өдрийн сонин
