Ням гарагийн өглөө Сирийн хилийн ойролцоо Йордан улсын нутагт оршдог АНУ-ын цэргийн баазад дроны халдлага гарсны улмаас гурван алба хаагч амиа алдаж, 34 цэрэг шархадсан билээ.
Хүнд шархадсан найман цэрэгт эрүүл мэндийн тусламж үзүүлэхээр баазаас нүүлгэн шилжүүлсэн байна.
Халдлагыг Ирак улсад үйл ажиллагаа явуулдаг Ираны дэмжлэгтэй зэвсэгт бүлэглэл үйлдсэнээ хүлээсэн юм. Тэгвэл үйл ажиллагааны алдааны улмаас энэхүү халдлагыг таслан зогсоож чадаагүйг Пентагоны албаны эх сурвалж өчигдөр мэдээлжээ.
Тухайлбал бааз руу нам өндрөөр нисэж ирсэн дроныг үүргээ гүйцэтгээд буцаж ирж буй өөрийн дрон гэж андуурсны улмаас хариу арга хэмжээ авч чадаагүй юм байна.
Энэ алдаа нь АНУ-ын цэргүүд амиа алдаж, олноор шархдах шалтгаан болжээ.
Урьдчилсан дүгнэлтийг The Wall Street Journal сонин нэрээ нууцалсан албаны эх сурвалжаас авснаа хамгийн түрүүнд мэдээлсэн байна.
Харин Цагаан ордон энэ талаар ямар нэг мэдэгдэл гаргаагүй байна.
Халдлагын дараа ерөнхийлөгч Жо Байден буруутай этгээдүүдийн эсрэг хатуу хариу арга хэмжээ авахаа амласан юм. Одоо тэрбээр ямар арга хэмжээ авахаа албаныхантай зөвлөлдөж байгаа гэсэн мэдээлэл ирж байна.
Аравдугаар сарын 7-ны үйл явдлын дараа Хамас-Израилийн дайн эхэлснээс хойш Ойрх Дорнод дахь АНУ-ын цэргийн баазууд олон арван удаа халдлагад өртөж байгаа. Гэхдээ Ням гарагийн халдлагаар анх удаа хүн хүчний хохирол амссан юм.
Ерөнхийлөгч Байдены хувьд хариу арга хэмжээ авахдаа Газын зурвасын дайныг Ойрх Дорнодын бусад хэсэгт өргөжүүлэхгүй байх шаардлагатай тулгараад байна.
“Бид Иран улстай дайтах сонирхолгүй байна. Бид хэдийнээ хурцдаад байгаа нөхцөл байдлыг нэмж хурцатгах хүсэлгүй байна. Гэхдээ энэ удаагийн халдлага маш ноцтой байсан. Үхэл дагуулсан халдлага байлаа. Бид зохих хариу арга хэмжээг авах болно” гэж Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби өчигдөр сэтгүүлчидтэй уулзахдаа мэдэгджээ.
Ираны эрх баригчид Йорданы баазын халдлагад оролцоогүйгээ өчигдөр бас мэдэгдсэн байна.
“Эдгээр мэдэгдлүүд нь бүс нутгийн нөхцөл байдлыг өөрчлөх улс төрийн тодорхой зорилготой байна” гэж Ираны гадаад хэргийн яамны хэвлэлийн төлөөлөгч Нассер Канаани халдлагад өөрийг нь хамаатуулсан АНУ-ын байр суурийг шүүмжилжээ.
Гэхдээ Тегераны дэглэм өөрийн дэмждэг зэвсэгт бүлэглэлүүдийн Ойрх Дорнод даяар үйлдсэн халдлагуудад хамаатайгаа байнга үгүйсгэсээр ирсэн юм.
Эх сурвалж: Associated Press
