Нийтийн тээврийнхний гаргасан явцгүй шийдвэр Нийслэлчүүдийн үгийг нь хэлүүлж үсийг нь зулгаалуулж байна. Энэ долоо хоногт хичээл сургууль эхэлсэн түгжрэл бүр нэмэгджээ. Замын ачаалал, түгжрэл нэмэгдэхийн хэрээр чиглэлийн автобус нь ор сураггүй алга болчихдог. Хичээл эхлэхээр нийтийн тээврийн зарим чиглэлийг өөрчилнө гэж ярьж байснаар өөрчлөөд нөхцөл байдлыг улам дордуулав. Богино эргэлт нэртэйгээр хэд дамжуулж, хэдэн минут яаж хүлээлгэж байгааг тооцоолоогүй нь үнэхээр харамсалтай. Уг нь өглөө, орой гэлтгүй оргил ачааллын үеэр богино эргэлтийн автобусны чиглэл, тоог өөрчилж нэмэгдүүлж байгааг Нийтийн тээврийн газраас мэдээлсэн ч бодит байдал дээр үйлчилгээ нь алга.

Хөхөө өвлийн хүйтэнд иргэдийг тамлаж бах таваа хангаж байгаа дарга нарыг иргэд харааж загнаж занаж гаслахаас өөр юу ч хийж чадахгүй шүү дээ. Уг нь таван ес эхэлсэн байгаа. Тавьсан будаа хөлддөггүй гэж ярьдаг. Гэвч ойрын үед хүйтний эрч чангарч өдөртөө -20-22 хэм байгаа бол өнөөдөр бүр -33 хэм зааж байна. Энэ хүйтэнд гадаа автобусны буудал дээр чиглэлийн автобусаа хүлээж хэдэн цаг минут зогсож байгаа иргэд ялангуяа бага насны хүүхдүүдийг өрөвдөх хайрлах сэтгэл Нийслэлийн удирдлагууд болоод Нийтийн тээврийн маршрут зохиож чиглэл өөрчилж байгаа албан тушаалтнуудад алга уу. Та нар дулаан машиндаа түгжрэл мэдэхгүй явж ажилдаа ирнэ, орой харина. Нийтийн тээврээр ажилдаа хичээлдээ явдаг хүмүүсийг яагаад ойлгох сэтгэл байдаггүй юм бэ.

Өчигдөр орой гэхэд Баруун 4 зам, ТБД андууд, 25 дугаар эмийн сан гэх мэт чиглэлд автобус бүр ирэхгүй ор сураггүй алга болов. Баруун 4 зам дээр автобус хүлээсэн иргэд олон. Автобусны бараа сураг байдаггүй. Ирж байгаа ганц нэг нь битүү хүнтэй, хаалга нээлээ хахсан хүмүүс нь бараг буцаж унаж байгаа харагдана. Даарч бээрсэн хүүхдүүд хэдий болтол хэдэн цаг автобус хүлээх ёстой юм бэ. Гэр нь ойрхон бол алхаад ч болов харьчихсан. Хаа байсан захын хороолол, алслагдсан дүүрэгт гэр нь байдаг иргэд яаж алхах вэ, ядаж халтиргаа гулгаа их учраас халтирч савж унаж эрүүл мэнд амь насаараа хохирчих гээд хэцүү хүнд байна. Ийм дүр зураг өдөр бүр угтаж байна. Ийм байдалтай хэдий болтол явах бэ.

Нийтийн тээврийн хүртээмж шуурхай байдлаа дээрдүүлж байгаа нэртэй бүр дордуулчихаад юу бодож байдаг шийдвэр гаргагчид бэ. Ямар ухаан ямар хараагаар харж байгаа үйлдэл бэ. Хаанаас хэнээс хариуцлага нэхэх вэ. Хэлэх муу үг, хийх муухай үйлдэл ч байхгүй болтол нь Нийслэлчүүдийг цөхрөөж туйлдуулж байна шүү. Ерөөсөө иргэдээрээ тоглож ханадаггүй шийдвэр гаргагч, эрх баригч нартай юм байна. Эд нарын тооцоолол төлөвлөгөөгүй шийдвэрүүд иргэдийг тоглоом болгож дууслаа. Бүр зориудаар ингэж тамлаж залхаан цээрлүүлэх гээд байдаг юмуу.

Өнөөдөр машины дугаарын хязгаарлалт дуусна. Маргаашнаас эхлээд бүх машин замын хөдөлгөөнд оролцоно. Түгжрэл бүр утгаа алдана. Зам дээрээ цаг хугацаагаа царцаасан мэт нам зогсож мөнхрөх нь ойлгомжтой. Эсвэл зориудаар түгжрэл үүсгэж, автобус алга болгоод байна уу. Түгжрэлээр машины дугаарыг дахин тэгш, сондгойгоор явуулахын тулд ийм балиар арга хэрэглээд байна уу хэмээн иргэд башир хандлагаар хардаад байна.

Яагаад нийслэлийн удирдлагууд иргэдээ дандаа дарангуйлж хааж боож, хяхаж хавчсан, цагдсан тооцоолол муутай шийдвэр гаргадаг юм бол. Ганцхан өчигдрийн тухайд нийтийн тээвэр нь ор сураггүй алга болгож, иргэд 20 минутаас 1 цаг бүр 2 цаг ч хүлээсэн хүн байна. Хол гэртэй хүмүүс дамжаад ч болов явъя, хүйтэнд алхах амаргүй байна. Гэвч автобус нь ирэхгүй хүлээсээр хөлдөж үхэхээс наагуур зогсож байна гэж ярьж байв. Автобусны буудал дээрээс олон хүн Энхтайваны гүүр даваад алхаж байсан. Хэдий болтол ийм байлгах вэ, хэзээ энэ нийтийн тээврийн үйлчилгээ чиглэл хэвийн болох вэ. Урд өмнө нь болоод яваад байсан чиглэлийг нь өөрчилж, нохойн замаар оруулчихаад өнөөдөр өөрсдийгөө өмгөөлсөн "болж байгаа бүтэж байна" гэж арьсаа хамгаална.

Автобус "асуудал" болж 1 цаг 20 минутын хугацаанд нэг ч автобус ирэхгүй, буудал дээр хүлээж байгаа томчууд, хүүхдүүд бүгд осголоо. Ямар нэгэн асуудал болвол хэн хариуцлага хүлээх вэ. Хэнээс хүний амь нас эрүүл мэндийг нэхэх вэ гэх мэт олон асуудал ар араасаа гарна шүү. Хариуцлага хүлээхэд бэлэн байгаарай шийдвэр гаргагчдаа.

Эх сурвалж: Toim.mn