Пакистан улсын шүүх ерөнхий сайд асан Имран Хан болон түүний гэргий Бушра Биби нарт өчигдөр 14 жилийн хорих ял оноолоо.

Тэднийг төрийн шугамаар гадаад орнуудаас хүлээж авсан бэлгээ зарж, хууль бус замаар ашиг олсон гэж буруутгасан байна.

Экс ерөнхий сайд, түүний гэргий нар бас Пакистаны төрийн сан хөмрөгт тус бүр 787 сая рупи ($2.8 сая) буцааж төлөхөөр болжээ.

Дөнгөж өмнөх өдөр нь Имран Хан төрийн нууц задруулсан хэргээр 10 жилийн хорих ял сонсоод байсан юм.

Пакистаны парламентын сонгуулиас долоо хоног орчмын өмнө гаргасан шүүхийн эдгээр шийдвэр улс төрийн зорилготой байх магадлалтай байна.

Крикетийн тамирчнаас улс төрч болсон 71 настай Имран Хан бас шүүхийн шийдвэрийг улс төржсөн, намыг нь сонгуульд оролцуулахгүй байх зорилготой гэж үзэж байгаагаа мэдэгдсэн юм.

Түүнийг 2018-2022 онд ерөнхий сайдаар ажиллахдаа төрийн сан хөмрөгт хадгалагдаж байсан бэлэг сэлтийг ашиг олох зорилгоор зарсан гэж буруутгажээ.

Пакистаны төрийн эрдэнэсийн сан хөмрөг Тошаханад тус улсын ерөнхий сайд, ерөнхийлөгч, сайд, парламентын гишүүдэд гадаад орнуудаас бэлэглэсэн үнэт эд зүйлс хадгалагддаг юм.

Имран Ханы гэргийн хамт ашиг олох зорилгоор зарсан эд зүйлсийн жагсаалтад 108 бэлэг багтжээ.

Эдгээр нь үнэртэн, үнэт чулуун эдлэл, хоолны хэрэгсэл, бугуйн цаг зэрэг зүйлс байсан байна. Тухайлбал долоон ширхэг бугуйн цаг байсны зургаа нь Rolex брэндийнх байжээ.

Тэдгээрийн хамгийн үнэтэй нь 85 сая рупийн ($300,000) үнэлгээтэй “Master Graff limited edition” байсан байна.

Пакистаны төрийн өндөр албан тушаалтнууд гадаад орнуудын төрийн тэргүүнүүдийн өгсөн бэлгийг хувьдаа худалдаж авах боломжтой байдаг. Хэрвээ үүнийгээ цааш зарах бол олсон орлогоо мэдүүлдэг байна.

Ихэнхдээ тэд харьцангуй хямд үнээр бэлгээ төрийн сан хөмрөгөөс авдаг ч цааш худалдсан тохиолдол ховор байдаг ажээ.

Имран Ханы хувьд бэлгийн эд зүйлсийг хуулийн дагуу худалдан авснаа хүлээсэн ч ашиг олох зорилгоор зарснаа няцаасан юм.

Гэвч прокурорууд түүнийг бэлэг зарж олсон орлогоо нуусан гэж дүгнэжээ.

Ерөнхий сайд асны туслахууд төрийн бэлэг сэлтийг Дубайд аваачин зарж, олсон орлогыг нуулцахад оролцсон хэрэгт буруутгагдсан байна.

Имран Хан өнгөрсөн оны наймдугаар сараас хойш нийтдээ 150 гаруй хэрэгт холбогдон шалгагдаж байгаа. Одоо тэр Пакистаны Равалпинди хотын Адиала шоронд хоригдож байна.

Гэргий Бушра Бибиг нь бас өчигдрөөс эхлэн тус шоронд хорьжээ. Экс ерөнхий сайдын өмгөөлөгч нар одоо шүүхийн шийдвэрийг давж заалдахаар бэлдэж байгаа юм.

Эх сурвалж: Aljazeera