Зарим эх сурвалжийн мэдээлснээр ажилтнууд нь аобан байрандаа архидан согтуурч ёс суртахуунгүй үйлдэл гаргасан байж болзошгүй гэгдээд байгаа "Тавантолгой төмөр зам" төрийн өмчит компанид Засгийн газар болон холбогдох газраас шалгалт оруулж байгаа ажээ.
Тодруулбал, "Тавантолгой төмөр зам" төрийн өмчит компанийн нэр бүхий алба хаагчид архидан согтуурч, зүй бус үйлдэл гаргасан байж болзошгүй дүрс бичлэг олон нийтийн сүлжээнд гарсан. Гурван сарын өмнө болсон энэ үйл явдлын бичлэг сая цагаан сарын дараа нийтэд тодорхой болсон бөгөөд үүнтэй холбоотойгоор Тавантолгой төмөр зам компанид ажилладаг эдгээр хүмүүсийг үүрэгт ажлаас нь чөлөөлж буй тухайгаа тус компаниас мэдэгдэж мэдэгдэл гаргаад байгаа.
Түүнчлэн олон нийтийн цахим сүлжээнд нийтлэгдсэн бичлэгтэй нь холбогдуулж Зөрчлийн тухай хуулийн 5.1 дүгээр зүйлийн 2 дахь хэсэгт заасны дагуу цагдаагийн байгууллагаас шалгалтын ажиллагааг эхлүүлсэн талаар ч эх сурвалж мэдээлсэн.
Тэгвэл хэрэг явдал үүгээр дуусахгүй бололтой. Тухайлбал, Засгийн газрын дэргэдэх Хяналт хэрэгжүүлэх газар, Төрийн өмчийн бодлого зохицуулалтын газар болон Цагдаагийн байгууллагаас ажлын хэсэг гарч "Тавантолгой төмөр зам" төрийн өмчит компанид шалгалтын ажлын эхлүүлсэн байна.
Тодотгоход, тус компанийн өмнөх захирал Н.Удаанжаргал гэмт хэрэг үйлдээд гадаадад зугатан гарсан бөгөөд эрэн сурвалжлах ажиллагаа одоо ч гэсэн үргэлжилсээр байгаа юм.
Toim.mn
