Өнгөрсөн долоо хоногт Донбассын хязгаарын Авдеевка хотоос Украины тал цэргээ татаж, Оросын арми хотыг бүрэн хяналтдаа авсан билээ.

Энэ хотын төлөө тулаан сүүлийн таван сар орчим хугацаанд эрчимжиж, талуудын аль аль нь ихээхэн хохирол амссан гэдэг.

Оросын цэрэг дайны сэдвээр бичдэг алдартай блогчдын нэг Андрей Морозов (Телеграм сувгийн нэр нь Murz) Авдеевкагийн төлөө тулаанд Оросын арми 16,000 хүн, 300 орчим техникээ алдсан тухай Ням гарагт мэдээлсэн юм.

Морозов нь Украинд явуулж буй засгийн газрынхаа дайныг дэмждэг, хэт үндсэрхэг үзэлтэй нэгэн ажээ.

Тэрбээр 2014 онд дорнод Украины нутагт Оросын дэмжлэгтэй салан тусгаарлагчидтай мөр зэрэгцэн байлдаж явсан, 2022 онд эхэлсэн эзлэн түрэмгийлэх дайнд ч бас оролцож байсан хүн юм.

Морозовын хохирлын тоо баримттай постыг Оросын томоохон суртал нэвтрүүлэгчид тэр дор нь ширүүн шүүмжилж, түүнийг “ОХУ-ын батлан хамгаалах яамыг гүтгэсэн” хэмээн буруутгаж байв.

Тэгвэл Мягмар гарагт Морозов амиа хорлосон байдалтай олдсоныг хэд хэдэн хүн мэдээлжээ. Тэрбээр өөрийгөө буудсан байсан гэнэ.

Амиа хорлохын өмнө бичиж үлдээсэн зурвастаа Морозов “Авдеевкагийн хохирлын талаар дэлгэрэнгүй тоо баримттай постоо устгахыг дээрээс шахаж, дарамталсан” тухай бичжээ.

Оросын эрх баригчид Украины дайны хохирлын талаар мэдээллийг чанд нууцалж, энэ талаар мэдээлсэн хүмүүсийг хатуу шийтгэж байгаа.

Өрнөдийнхөн Украины дайны хоёр жилийн хугацаанд Оросын армийн алагдаж, шархадсан цэргийн тоо 315,000 давсан гэж тооцоолоод байна.

Дайны өмнө 32,000 оршин суугчтай байсан Авдеевка хотыг Оросын арми Бямба гарагт бүрэн хяналтдаа авсан. Энэ нь 2023 оны тавдугаар сард Бахмут хотыг эзэлснээс хойш Оросын армийн байгуулсан хамгийн том ялалт болж байна.

Авдеевкаг 2014 онд салан тусгаарлагчид хэсэгхэн хугацаанд эзэлсний дараа Украины арми буцаан чөлөөлж байсан юм.

Гэхдээ Авдеевкаг авсан амжилт нь Оросын талд нэлээд өндөр үнээр олдсон гэж мэргэжилтнүүд үзэж байгаа.

Тухайлбал Их Британийн батлан хамгаалах яам энэ тулаанд Оросын арми 400 орчим танк, хуягт тэрэг зэрэг зэвсэг техник, олон мянган хүнээ алдсан байх магадлалтай гэж мэдээлсэн юм.

Украины албаныхан Оросын хүн хүчний хохирлыг 17,000 гэж мэдээлсэн нь Морозовын мэдээлсэн тоотой ойролцоо байна.

Киевийн эрх баригчид Авдеевкагаас ухарсан шалтгаанаа Өрнөдийн, тэр дундаа АНУ-ын зэр зэвсгийн тусламж саатсантай холбон тайлбарлаж байгаа.

“Хэрвээ бидэнд шаардлагатай их бууны сум байсан бол Авдеевкаг алдахгүй байлаа. Оросын тал тулаанаа завсарлах, хүчээ татах санаагүй байгаа. Тэд Авдеевкаг авсныхаа дараа өөр нэг хотыг сонгон довтлох нь дамжиггүй” гэж Украины гадаад хэргийн сайд Дмитро Кулеба хэлжээ.

Цэргүүд нь амжилтаа бататгахын тулд Украины нутаг дэвсгэрийн гүн рүү дайралтаа үргэлжлүүлэх ёстойг Мягмар гарагт ОХУ-ын ерөнхийлөгч Владимир Путин батлан хамгаалахын сайд Сергей Шойгутай уулзахдаа хэлсэн байна.

Эх сурвалж: The Guardian