АНУ-ын ерөнхийлөгч Жо Байден өчигдөр Сан-Франциско хотод болсон сонгуулийн хандив цуглуулах арга хэмжээний үеэр ОХУ-ын ерөнхийлөгч Владимир Путинийг гудамжны үг хэлээр муулсан тухай эх сурвалжууд мэдээлжээ.
Тухайлбал тэр Путинийг “галзуу SOB (son of b***)” гэж нэрлэсэн байна.
“Хүн төрөлхтний оршин тогтнолд учруулах хамгийн том аюул бол уур амьсгалын өөрчлөлт юм. Путин болон бусад галзуу SOB-ууд байгаа цагт бид цөмийн мөргөлдөөний аюулд үргэлж санаа зовох ёстой. Гэхдээ хамгийн том аюул бол уур амьсгалын өөрчлөлт юм” гэж Байден цөөн тооны хандивлагчдын өмнө ярьжээ.
Байден сонгуулийн хандив цуглуулах арга хэмжээнүүдэд оролцохоор Баруун Эргийн бүс нутагт гурван өдөр саатах юм.
Тэрбээр өмнө нь “SOB” хэмээх үгийг бусдад хэлж байсан түүхтэй. Тухайлбал 2022 оны нэгдүгээр сард Цагаан ордонд ажилладаг Fox News сувгийн сэтгүүлчийн эсрэг ийм үг хэрэглэж байгаа нь санамсаргүй микрофонд бичигдэж байжээ.
Байден ер нь сонгуулийн ихэнх хандивын арга хэмжээнүүдийг хаалттай зохион байгуулж, хөшигний ард илэн далангүй ярьдаг уламжлалтай.
Өнгөрсөн долоо хоногт Оросын сөрөг хүчний улстөрч Алексей Навальный шоронд нас барахад Путинийг тэр бас хатуу үгээр шүүмжилж байв.
“Бид яг юу болсныг мэдэхгүй ч Навальныйн үхэл нь Путин болон түүний дээрэмчдийн хийсэн үйлдлийн үр дагавар гэдэгт итгэлтэй байна” гэж Байден энэ үеэр хэлсэн юм.
Тэрбээр бас Украины дайн эхэлснээс хойш ОХУ-ын ерөнхийлөгчийг “яргачин”, “дайны гэмт хэрэгтэн” гэх зэргээр цоллож байсан удаатай.
Навальныйн үхэл болон Украины дайнтай холбогдуулан ОХУ-ын эсрэг ээлжит томоохон хориг арга хэмжээг зарлахаар төлөвлөж буйг Мягмар гарагт Байден мэдэгдсэн юм.
Түүнтэй энэ оны сүүлээр АНУ-ын ерөнхийлөгчийн сонгуульд өрсөлдөх магадлалтай байгаа Бүгд Найрамдах намын Дональд Трампын хувьд Путинийг шүүмжлэхээс үргэлж зайлсхийдэг.
Саяхан Трамп удтал чимээгүй байсны эцэст Навальныйг дурсахдаа өөрийгөө түүнтэй адил улс төрийн дарамт шахалтын золиос болж байгаа тухай ярьсан юм.
Байден өрсөлдөгчийнхөө энэ харьцуулалтыг “Энэ нөхөр өөрийгөө Навальныйтай зүйрлэж, манай улс коммунист дэглэмтэй болсон тул Навальный шиг хавчигдаж байгаа гэж ярьсан. Ямар үндэслэлээр ийм зүйлс ярьсныг нь би ойлгохгүй байна. Хэрвээ би 10, 15 жилийн өмнө энд зогсоод ингэж ярьсан бол та нар бүгд намайг шийдчихсэн амьтан гэж бодох байсан. Энэ нь намайг гайхшируулж байна” гэж шүүмжилжээ.
Эх сурвалж: Reuters
