Баасан гарагт Оросын сошиал ертөнцөд Германы батлан хамгаалах яамны албан хаагчдын дотоод ярианы бичлэг гэх материал нийтлэгдсэн юм.
38 минутын урт уг бичлэгт Германы Taurus пуужингийн системийг Украинд нийлүүлбэл ямар үр дагавартай талаар хэлэлцэж байжээ.
Бас Франц, Их Британи улсуудын Украинд нийлүүлсэн алсын тусгалын пуужингийн талаар ярилцаж байгаа нь энд бичигдсэн байна.
Ням гарагт Германы батлан хамгаалахын сайд Борис Писториус үүнийг Оросын мэдээллийн дайны нэг хэсэг гэж үзэж байгаагаа илэрхийлжээ.
“Энэ бол Путиний (ОХУ-ын ерөнхийлөгч) явуулж буй мэдээллийн дайны нэг хэсэг. Энэ нь биднийг хагаралдуулж, эв нэгдэлгүй болгох зорилготой. Үүнд бид илүү шийдэмгий хариу үйлдэл үзүүлэх ёстой” гэж Писториус хэлээд Путиний төлөвлөгөө амжилтад хүрэхгүй гэдэгт итгэлтэй байгаагаа мэдэгдсэн байна.
Дотоод ярианы бичлэг ямар замаар задарсныг мөрдөн шалгаж байгаагаа тэр бас хэлжээ.
Шалгалтын үр дүн энэ долоо хоногийн эхээр гарахыг бас амласан байна.
Германы эх сурвалжуудын мэдээлснээр албаныхан АНУ-ын бүтээсэн Webex онлайн хурлын платформыг хэлэлцүүлэгтээ ашиглажээ.
Шалгалтын үр дүн гарсны дараа дотоод харилцаа холбоондоо ямар платформ ашиглах нь аюулгүй болохыг үнэлж цэгнэх тухай Писториус ярьсан байна.
Киевийн эрх баригчид удаан хугацаанд 500 км хүртэл алсын тусгалтай Taurus пуужингаа нийлүүлэхийг Германы засгийн газраас хүсэж байгаа.
Канцлер Олаф Шольц дайны цар хүрээ өргөжихөөс болгоомжлон уг хүсэлтэд татгалзсан байр суурьтай байна.
Хэрвээ Германы тал Taurus пуужингаа нийлүүлбэл энэ нь Украины зэвсэгт хүчинд том давуу тал болох юм.
Франц, Их Британи улсууд Украинд өөр өөрийн SCALP, Storm Shadow пуужингуудыг нийлүүлсэн нь 250 км хүртэл тусгалтай байгаа.
Өнгөрсөн Даваа гарагт канцлер Шольц хэлэхдээ Франц, Их Британи улсууд Украинд пуужин нийлүүлсэн нь Германы шийдвэрт нөлөөлөхгүйг мэдэгдсэн юм.
“Энэ бол маш холын тусгалтай зэвсэг. Их Британи, Францын хийж буй зүйлийг Герман улс дагах албагүй” гэж тэр хэлжээ.
Өчигдөр буюу Ням гарагт ОХУ-ын ерөнхийлөгч асан Дмитрий Медведев “Герман улс Оростой дайтахаар бэлдэж байна” гэж анхааруулсан нь задарсан бичлэгтэй холбоотой мэдэгдэл бололтой.
Эх сурвалж: AFP
