Өнгөрсөн долоо хоногийн сүүлээр Унгарын ерөнхий сайд Виктор Орбан АНУ-ын ерөнхийлөгч асан Дональд Трамптай түүний Флорида дахь Мар-а-Лаго эдлэнд уулзсан байна.
Тэрбээр Ням гарагт Унгарын хэвлэлд ярихдаа “Трамп ерөнхийлөгч болбол Украин-Оросын дайнд сохор зоос ч төлөхгүй гэсэн. Ингэвэл дайн дуусна. Үгүй бол Украин хөл дээрээ зогсож чадахгүй болох нь ойлгомжтой” гэжээ.
Орбаны хэлснээр Трамп хоёр жил гаруйн өмнө эхэлсэн уг дайныг дуусгах “дэлгэрэнгүй төлөвлөгөө”-тэй байгаа гэнэ.
АНУ-ын одоогийн засаг захиргаа болон түүний холбоотнууд Украины тэмцлийг бүх талаар дэмжиж байгаа.
Гэхдээ Вашингтоны Украинд үзүүлэх ээлжит зэр зэвсгийн тусламжийн төсвийг Конгресс дахь Сенатын танхим дэмжсэн ч Төлөөлөгчдийн танхим саатуулаад байна. Үүнд Төлөөлөгчдийн танхим дахь Трампын фракцынхан гол нөлөө үзүүлж байгаа юм.
Орбан ярилцлагадаа Трампыг “энх тайванч хүн” гэж магтжээ.
“Хэрвээ Америкчууд мөнгө, зэвсэг өгөхөө зогсоовол дайн дуусна. Европ ганцаараа дайныг санхүүжүүлэх боломжгүй” гэж тэр ярьсан байна.
Өөрөөр хэлбэл дайнд Украин ялагдаж, эзлэгдсэн нутаг дэвсгэрийг нь Оросын хяналтад үлдээх хувилбарыг тэр хэлжээ.
Хэдийгээр 91 төрлийн эрүүгийн хэрэгт холбогдож, бизнесийн үйл ажиллагаатай холбоотой иргэний нэхэмжлэлээр олон сая долларын өр төлбөрт орсон ч Дональд Трамп нь энэ оны ерөнхийлөгчийн сонгуульд Бүгд Найрамдах намаас нэр дэвших магадлалтай байгаа.
ОХУ-ын ерөнхийлөгч Путинд хүндэтгэлтэй ханддагаа нуудаггүй Трамп дахин сонгогдвол хамтын санхүүжилтийн үүргээ биелүүлэхгүй байгаа НАТО-гийн гишүүн орнуудыг Оросын эзлэн түрэмгийллийн золиос болгохоос буцахгүйгээ саяхан мэдэгдсэн билээ.
АНУ-ын ерөнхийлөгч Жо Байден түүний энэ мэдэгдлийг “тэнэг, ичгүүргүй, америк бус” хэмээн шүүмжилж байв.
Флоридад болсон уулзалтын дараа Орбан, Трамп нар харилцан бие биеэ магтацгаасан байна.
“Ерөнхийлөгч Трамп бол энх тайванч ерөнхийлөгч байсан. Тэр энэ талаараа дэлхий дахинд хүндлэгдсэн удирдагч. Түүнийг ерөнхийлөгчөөр ажиллаж байх хугацаанд Ойрх Дорнод, Украинд энх тайван тогтож байсан. Хэрвээ тэр АНУ-ын ерөнхийлөгч хэвээр байсан бол өнөөдөр дайн дажингүй байх байлаа” гэж Орбан ярьжээ.
Тэр цааш нь “Энх тайвныг эрхэмлэдэг удирдагчид байгаа цагт дайн гарахгүй гэдэг дээр бид санал нэгдлээ. Унгар улс эдгээрийн нэг гэдгээрээ бахархаж байна. Америк, Унгарын эдийн засгийн харилцаанд маш их боломж байгаа гэдэгт бид санал нэгдэж байна. Энд Америкт өнөөдөр сонгуулийн кампанит ажил ид өрнөж байна. Америкчууд өөрсдийн шийдвэрийг гаргах гэж байна. Ерөнхийлөгч Дональд Трамп засгийн эрхэнд дахин гарах нь дэлхий дахинд, Унгар улсад ч илүү дээр байх болно гэдгийг бид шударгаар хүлээн зөвшөөрөх ёстой. Унгарчуудад ч энэ хамаатай” гэж хэлсэн байна.
Трамп хариуд нь “Виктор Орбанаас илүү ухаалаг, илүү сайн удирдагч байхгүй. Тэр бол гайхалтай. Тэр бол “Ийм байх ёстой” гэж хэлээд л асуудлыг дуусгадаг хүн. Тэр бол босс. Үгүй ээ, тэр бол аугаа удирдагч” гэж магтжээ.
Бямба гарагт Филадельфид дэмжигчидтэйгээ уулзах үеэрээ ерөнхийлөгч Байден “Өнөөдөр Мар-а-Лагод тэр хэнтэй уулзаж байгааг та нар мэдэж байна уу? Унгарын Орбантай. Ардчилал бүтэхгүй, дарангуйллыг илүү дээр гэж шулуухан хэлдэг хүнтэй уулзаж байна” гэж өрсөлдөгчөө шүүмжилсэн юм.
Даваа гарагт CNN сувгийн аюулгүй байдлын шинжээч Жим Скиутто экс ерөнхийлөгчийн зөвлөх асан Жон Болтонтой ярилцахдаа Трампын дарангуйлалд хандах хандлагын талаар байр суурийг нь сонссон юм.
“Тэр өөрийгөө том хүн гэж боддог. Тэр бусад том хүмүүстэй харилцах дуртай. Хүмүүсийг хэнээс ч зөвшөөрөл авалгүйгээр шоронд хийх гэх мэт зүйлс түүнд таалагддаг” гэж Трампын засаг захиргааны гурав дахь үндэсний аюулгүй байдлын зөвлөх асан Болтон энэ үеэр ярьжээ.
Эх сурвалж: The Guardian
