Саудын Арабын робот технологийн QSS компани өнгөрсөн долоо хоногт тус улсын анхны хүн дүрст (humanoid) роботыг олон нийтэд танилцуулжээ.
Араб үндэсний хувцас өмссөн “Muhammad the Humanoid Robot” нэртэй уг робот танилцуулгын үеэр араб, англи хэлээр ярьж байв.
Арга хэмжээг зохион байгуулагчид үүнийг Саудын Арабын анхны хүн дүрстэй робот, тус улсад хиймэл оюуны салбар амжилттай хөгжиж буйн баталгаа гэх зэргээр сурталчилж байжээ.
Гэтэл энэхүү техник урд нь зогсоод үзэгчдэд үг хэлж байсан “Al Arabiya” сонины сэтгүүлч Равя Кассемын биед гэнэт халдаж, зохион бүтээгчдээ эвгүй байдалд оруулсан байна.
Нийтэд тарсан дүрс бичлэгт сэтгүүлч эмэгтэйн өгзөгт роботын гар хүрч буйг харуулжээ.
Кассем энэ үеэр робот руу эргэж ширүүн харсны дараа цааш яриагаа үргэлжлүүлсэн байна.
Saudi Arabia unveils its man shaped AI robot Mohammad, reacts to reporter in its first appearance pic.twitter.com/1ktlUlGBs1
— Megh Updates 🚨™ (@MeghUpdates) March 6, 2024
Болсон явдлын дараа QSS компани бүтээлээ хүний удирдлагагүй, бүрэн бие дааж ажилладаг гэхээс өөр тайлбар өгөөгүй юм.
Мөн арга хэмжээнд оролцогчдод бүтээгдэхүүнд нь хэт ойртохгүй байхыг урьдчилж анхааруулснаа сануулжээ.
Сүүлд Метро сонинд өгсөн тодруулгадаа QSS компанийн төлөөлөгч “нийтэд тарсан дүрс бичлэгийг шинжлээд Мухаммaд робот дүрмээс гадуур үйлдэл гаргаагүй” гэж дүгнэснээ мэдэгдсэн байна.
Гэхдээ хөдөлгөөнд нь саад учруулах хэмжээнд хүн ойртсон тохиолдолд робот хэрхэн бие зөв авч явах талаар нэмэлт арга хэмжээ авахаа амлажээ.
Хиймэл оюуны технологийн хөгжил эрчимжиж буй энэ үед хүн дүрст роботын салбар мөн хурдтай хөгжих ирээдүйтэй гэж судлаачид үздэг.
Тухайлбал энэ салбарын зах зээлийн хэмжээ 2028 онд $13.8 тэрбумд хүрэхийг MarketsandMarkets байгууллага тооцоолсон нь бий.
Гэхдээ ийм робот хүний ажлын байрыг булаахад “урт хугацаа орно” гэж мэргэжилтнүүд үзэж байна.
Эх сурвалж: Business Insider
