АНУ-ын ерөнхийлөгч Жо Байден өчигдөр өөрийн эрх мэдлийн хүрээнд $300 саяын үнэ бүхий зэр зэвсгийг Украинд илгээх гэнэтийн шийдвэр гаргалаа.
Үүнээс том буюу $60 тэрбумын тусламжийн багц Конгресст саатаад байгаа. Сенатын танхим уг багцыг дэмжсэн бол Төлөөлөгчдийн танхим дахь Трампын холбоотон Бүгд Найрамдахчууд хэлэлцүүлэхийг хойшлуулсаар байна.
Өчигдөр зарласан багц нь сүүлийн бараг гурван сарын хугацаанд АНУ-аас Украинд үзүүлсэн анхны тусламж болж байгаа юм.
“Энэ тусламж Украины армийг зэр зэвсгийн нөөцгүй болохоос сэргийлж чадахгүй. Богино хугацаанд хомсдолыг нөхөх зорилготой” гэж Цагаан ордны үндэсний аюулгүй байдлын зөвлөх Жэйк Салливан сэтгүүлчдэд мэдэгджээ.
Украинаас гадна Израиль, Тайваньд үзүүлэх зэвсгийн тусламжийг багтаасан томоохон төсвийг баталж өгөхийг Цагаан ордон хэдэн сарын турш Конгресст уриалж байгаа.
Трампын холбоотон болох Төлөөлөгчдийн танхимын спикер Майк Жонсон уг тусламжийг хэлэлцэхээс татгалзсаар байна.
Ингэхдээ Сенатын дэмжсэн хувилбарыг бус, өөрийн санаачилсан хувилбарыг зөвхөн АНУ-ын цагаачлалын системтэй холбоотой төсвийг баталсны дараа хэлэлцэхээ мэдэгдээд байгаа юм.
Өчигдөр Польшийн ерөнхийлөгч, ерөнхий сайд нарыг Цагаан ордонд ерөнхийлөгч Жо Байден хүлээж авч уулзсан нь Украины тэмцлийг дэмжих зорилготой байлаа.
Өчигдөр бас Дани улсын засгийн газар $336 саяын үнэ бүхий сум, их бууг Украинд илгээх шийдвэрийг зарлажээ.
Эх сурвалж: BBC
