Өчигдөр буюу Мягмар гарагт Украины арми ОХУ-ын нутаг дэвсгэрт агаарын томоохон довтолгоо явуулжээ.

Үүнийг энэ дайны хоёр жил гаруйн хугацаанд явуулсан хамгийн том ажиллагаануудын нэг гэж үзэж байна.

ОХУ-ын батлан хамгаалах яам Москва, Ленинград, Белгород, Курск, Брянск, Тула, Орёл зэрэг бүс нутагт Украины 25 нисгэгчгүй онгоцыг устгаснаа мэдээлжээ.

Украины дронууд Оросын эрчим хүчний дэд бүтцүүдийг чиглэсэн байна.

Тухайлбал Нижегород мужийн нутаг дэвсгэрт оршдог Лукойл компанийн Норси (Нижегороднефтеоргсинтез) газрын тос боловсруулах үйлдвэр халдлагад өртөж, гал гарчээ.

Мужийн захирагч Глеб Никитин галыг унтраах ажил үргэлжилж байгааг Телеграм хуудсандаа мэдээлэхдээ Норси үйлдвэрийн дэргэд зогсож буй гал сөнөөгч автомашины зургийг үзүүлсэн байна.

Салбарын эх сурвалжуудын мэдээлснээр Норси үйлдвэрийн түүхий газрын тос нэрэх гол төхөөрөмж (AVT-6) халдлагад өртсөн бололтой.

Энэ нь хамгийн багадаа үйлдвэрлэлийн тал хэсэг зогссон гэсэн үг юм. Өрнөдийн эдийн засгийн хоригт орсон Орос улс ийм төрлийн тоног төхөөрөмжийнхөө ихэнх хэсгийг импортолдог.

Лукойл компани үйлдвэрийнхээ хохирлын талаар мэдээлэл өгөхөөс татгалзсан байна.

Норси жилд 15.8 сая тонн газрын тос боловсруулдаг нь Оросын нийт боловсруулалтын 5.8 хувь болдог гэнэ.

Мөн Оросын нийт бензиний 11 хувь, дизель түлшний 6.4 хувь, онгоцны шатахууны 7.4 хувийг үйлдвэрлэдэг тухай салбарын эх сурвалж мэдээлжээ.

Үүний улмаас Оросын дотоод зах зээлд бензин, шатахууны хомсдол эрчимжих магадлалтай юм.

ОХУ-ын засгийн газар гуравдугаар сарын 1-нээс зургаан сарын хугацаанд бензиний экспортоо зогсоогоод байгаа билээ.

Эх сурвалж: Reuters