Украины талд тулалдаж буй Оросын сайн дурын зэвсэгт бүлэглэлүүд өчигдөр хамтарсан мэдэгдэл гаргажээ.
Уг мэдэгдэлдээ тэд хил орчмын Белгород, Курск мужуудын нутаг дэвсгэрт байрлаж буй Оросын цэргийн байгууламжуудад довтлохоор бэлдэж буй тул энэ бүс нутгаас нүүхийг иргэдэд уриалсан байна.
“Путиний алуурчид Украины тайван амгалан хотуудад агаараас довтлохдоо таны гэр орон, хүүхдийн сургууль, төрийн байгууллагуудын дундах газрыг байрлалаа болгон ашиглаж байна” гэж Телеграм сүлжээнд нийтлэгдсэн мэдэгдэлдээ Чөлөөт Оросын Легион, Оросын Сайн Дурын Корпус, Сибирийн Батальон зэвсэгт бүлэглэлүүд өгүүлжээ.
Уг гурван бүлэглэл нь Украины талд дайтаж буй Оросын иргэдээс бүрддэг юм.
“Тиймээс бид Белгород, Курск мужийн хотууд дахь цэргийн байгууламжуудад цохилт өгөхөөс өөр аргагүй болж байна. Хүмүүсийн амь насыг хамгаалах үүднээс Курск, Белгородын хотуудаас иргэдийг нүүлгэн шилжүүлэхийг орон нутгийн эрх баригчдад уриалж байна” гэж дээрх мэдэгдэлд өгүүлжээ.
Уг мэдэгдлийг гарахаас нэг цагийн өмнө Курск мужийн захирагч Роман Старовойт агаарын түгшүүр зарлаж, иргэдийг хоргодох байранд орохыг анхааруулж байв.
Мягмар гарагт ОХУ-ын батлан хамгаалах яам Украины хилээр нэвтрэх гэсэн зэвсэгт бүлэглэлүүдийн дараалсан оролдлогыг амжилттай няцааснаа мэдэгдэж байлаа. Харин зэвсэгт бүлэглэлүүд Курск мужийн Тёткино тосгоныг хяналтдаа авсныг мэдээлсэн юм.
Талуудын өгсөн мэдээллийг хөндлөнгийн эх сурвалжаар батлах боломж одоогоор байхгүй байна.
Украины цэргийн тагнуулын алба энэ ажиллагааг зэвсэгт бүлэглэлүүд бие даан явуулж байгаа, Киевийн эрх баригчдын оролцоо байхгүйг мэдэгдсэн юм.
Эх сурвалж: The Moscow Times