Түүхэндээ анх удаа эмэгтэйчүүдийг хугацаат цэргийн албанд дайчилдаг болж байгаагаа Дани улсын засгийн газар өчигдөр зарлажээ.
Мөн НАТО-гийн гишүүн орны үүргээ биелүүлэхийн тулд ирэх таван жилийн хугацаанд батлан хамгаалах төсвөө $6 тэрбумаар нэмэгдүүлэхээр болсон байна.
“Бид дайныг хүссэндээ дахин зэвсэглээгүй. Бид дайнаас зайлсхийхийн тулд дахин зэвсэглэж байна” гэж Дани улсын ерөнхий сайд Метте Фредериксен мэдэгджээ.
2022 оны хоёрдугаар сард Оросын цэрэг Украины газар нутагт халдан довтолсноос хойш Европын орнууд аюулгүй байдалдаа онцгой анхаарах болсон.
Дани улсад эмэгтэйчүүд сайн дураар цэргийн алба хаах боломж нээлттэй байсан бол 2026 оноос эхлэн албан ёсны үүрэг болж байна.
Ингэснээр Швед, Норвегийн дараа Европын орнуудаас эмэгтэйчүүдийг цэргийн албанд дайчилдаг гурав дахь улс Дани болж байгаа юм.
Энэ удаагийн шинэчлэлээр Дани улс бас цэргийн алба хаах хугацааг одоогийн дөрвөн сараас 11 сар болгон сунгажээ. Ингэхдээ хүйс харгалзахгүй юм байна.
Өнгөрсөн онд тус улсын армид 4,700 хүн алба хаахаар татагдсаны 25 хувь нь эмэгтэйчүүд байжээ. Энэ тоо цаашдаа 5,000 болж өсөх гэнэ.
Дани улсын зэвсэгт хүчний нийт бие бүрэлдэхүүн 20,000 байдгийн 9,000 нь мэргэжлийн цэрэг юм.
Зургаан сая хүн амтай тус улс одоо дотоодын нийт бүтээгдэхүүнийхээ 1.4 хувийг батлан хамгаалах салбарт зарцуулж байгаа бол НАТО-гийн стандартын дагуу 2 хувь болж нэмэгдэх ажээ.
Дани улс нь Оросын эзлэн түрэмгийллийн эсрэг Украины тэмцлийг тууштай дэмждэг орнуудын нэг юм. Тус улс орчин үеийн зэвсэг техник, хөрөнгө мөнгөөр туслахын зэрэгцээ АНУ-ын F-16 сөнөөгч онгоцны нисгэгчдийг бэлдэж байна.
Эх сурвалж: BBC