Өчигдөр буюу Лхагва гарагт ОХУ-ын төрийн Думын нэг гишүүн импортын цэцгээр эмэгтэйчүүдээ баярлуулсан эх орон нэгтнүүдээ Украиныг санхүүжүүлсэн гэж шүүмжилжээ.
Энэ жилийн Олон Улсын Эмэгтэйчүүдийн Өдөр тус улсын иргэд $6 тэрбумаар Нидерланд улсаас амьд цэцэг худалдаж авсан юм байна.
“Энэ олон тэрбум доллар хаашаа явж байгааг та нар мэдэж байна уу? Голланд руу” гэж Шударга Орос намын хууль тогтоогч Олег Нилов өчигдрийн чуулганы үеэр хэлжээ.
Нидерланд улс Украинд зэр зэвсгээр тусалдаг орнуудын нэг бөгөөд импортын цэцэг худалдаж авах нь дайснаа шууд бусаар зэвсэглэсэн хэрэг болохыг тэр анхааруулсан байна.
“Бид яагаад өөрийн сарнай, алтанзул цэцгийг тарьж болдоггүй юм бэ?” гэж Нилов бусад хууль тогтоогчдоос асуусан юм.
Украины дайныг дэмжсэн шалтгаанаар Өрнөдийн орнуудын хоригоор шийтгүүлсэн Нилов нь дуулиантай мэдэгдэл хийдгээрээ алдартай нэгэн.
2022 оны арванхоёрдугаар сард тэр Украины хүүхдүүдэд шинэ жилийн бэлэг болгон пуужин харвах тухай хошигнож байжээ.
Ер нь энэ жилийн эмэгтэйчүүдийн өдөр ОХУ-д нэлээд улс төржсөн, дайны суртал нэвтрүүлэг туссан агуулгатай болж өнгөрсөн.
Төрийн Думын гэр бүлийн байнгын хорооны дэд дарга Виталий Милонов эмэгтэйчүүдэд цэцэг бэлэглэхийн оронд хүүхэд бэлэглэхийг уриалж байв.
“Эмэгтэйчүүдийн хамгийн шилдэг бэлэг жирэмслэлт гэдэгт би бүрэн итгэлтэй байна” гэж тэр “Говорит Москва” радио сувгаар яриад бүсгүйчүүдээ жирэмслүүлж, улам олон хүүхэдтэй болохыг эрчүүдэд уриалж байжээ. Ингэхдээ тэр бас хэтрүүлэн ууж, согтуудаа үр тогтоохоос сэргийлэхийг анхааруулсан юм.
ОХУ-ын ерөнхийлөгч Путин энэ өдөр эмэгтэйчүүдэд хандаж хэлсэн үгэндээ Милоновын санааг давтсан байна.
“Эмэгтэй хүн бүрийн хувьд хамгийн чухал зүйл бол ямар ажил мэргэжилтэй, ямар ололт амжилттай байхаас үл хамааран гэр бүл, үр хүүхдээ халамжлах юм” гэж тэр хэлжээ.
Путин 2024 оныг гэр бүлийн жилээр зарлаж, Оросын хүн амын бууралтыг зогсоохын тулд төрөлтийг нэмэгдүүлэхэд чиглэсэн арга хэмжээнүүд авахаа амласан юм.
Эх сурвалж: The Moscow Times
