Монгол судлаач, орчуулагч, ахмад дипломат Ю.Н.Кручкин NTV телевизийн "Global talk" нэвтрүүлэгт уригдан оролцжээ. Түүнийг монголчууд Аюур нэрээр нь сайн мэддэг. Тэрбээр 40 гаруй жил Монголд ажиллаж, амьдарч байгаа аж.

Ярилцлагын үеэр Оросын цэрэг Украинд халдаж, дайн эхлүүлсэн үйл явдлыг Оросын нийгэм хэрхэн хүлээж авч байгаа талаар байр сууриа илэрхийлснийг NTV телевизийн зөвшөөрөлтэйгөөр хүргэж байна.

Ю.Н.Кручкин "Миний бодлоор Орос, Украины дайныг дэмжиж байгаа нь Оросын нийт иргэдийн 10%-аас хэтрэхгүй, дэмжихгүй эсэргүүцэж байгаа нь мөн 10%. Үлдсэн 80% аль нь ч биш буюу намаг. Миний харьцаж байгаа, таньдаг хүмүүс дотор дайныг ямар нэг маягаар дэмжиж байгаа 2-3 хүн байна, бусад нь эсэргүүцэж, дургүйцдэг.

Математикийн талаас нь бодоод хэлбэл шал хэрэггүй дайн юм. Оросын талаас бөмбөгдөж буй бөмбөгүүдийн 98% хоосон газарт унаад байгаа нь цэргийн, зэвсгийн үйлдвэрийн дарга нарт ашигтай байна. Хувь хүнд хэрэгтэй, ашигтай зүйл байхгүй гэж бодож байна.

Дайныг дагаад сайшааж болохгүй олон үйл явдал болж байгаа. Жишээлбэл Оросын Засгийн газар, ерөнхийлөгч 70,000 хоригдлыг чөлөөлж, дайнд явуулсан байна. Судлаад байхад 70,000 хоригдлоос 10,000 нь Монголын хил залгаа захиргааны нэгжид харьяалагдаж байгаа.

Өөрөөр хэлбэл шоронгоос гарсан, буутай, зэвсэгтэй 10,000 хоригдол Монголын хил дээр ирсэн гэсэн үг. Тува, Эрхүү, Буриад, Өвөр Байгалийн хязгаараас гараад дайнд явсан 10,000 хоригдол Монголын хил дээр буцаж ирсэн.

Тува, Буриадаас олон залууг дайнд явуулсан, зарим тосгонд эрэгтэй хүн бараг үлдсэнгүй. Оросын хэвлэлээс харвал дайнд явсан хүмүүсээс дээрэмчин талын хүмүүс буцаж ирж байна. Хүмүүнлэг хүмүүс дайнаас эргэж ирэхгүй. Монголд яаж нөлөөлөх, ямар асуудал байж болохыг үүнээс харж болно.

Оросын эдийн засаг хямралд орвол шатахууны асуудал зэргээр Монголд шууд нөлөөлнө" хэмээн ярьжээ.