Дэлхийн хамгийн хүчирхэг пуужинд тооцогдож буй SpaceX компанийн Starship пуужинг өчигдөр гурав дахь удаагаа туршлаа.
Энэ удаа өмнөхөөсөө илүү урт зам туулж чадсан пуужин дэлхийн агаар мандалд буцаж орохдоо Энэтхэгийн далай дээр сүйрсэн байна.
Starship нь саран дээр хүн буулгах, цаашлаад Ангараг гарагийг эзэмшихэд ашиглагдах зорилготой бүтээгдсэн юм.
Пуужингийн өмнөх хоёр туршилт дэлбэрэлтээр өндөрлөсөн ч Илон Маскийн SpaceX компанийн хувьд үүнийг төлөвлөгөөний дагуу болсон гэж үздэг. Тус компани шинэ техникийг лабораторийн орчинд туршихын оронд бодит амьдрал дээр дараалан туршиж, өмнө гаргасан алдаануудаа засаж, сайжруулах замаар ажилладаг юм.
Энэ арга нь ч үр дүнгээ өгч, одоо тус компанийн Falcon 9 пуужин, Dragon сансрын хөлөг NASA-гийн гол ажлыг нугалж байгаа.
Starship пуужин 121 метр өндөр бөгөөд энэ нь Эрх Чөлөөний хөшөөнөөс даруй 27.4 метрээр илүү гэсэн үг.
Пуужингийн Super Heavy Booster хурдасгуур 74.3 Мега ньютон тийрэлтийн хүч гаргадаг нь өнөөдрийн хамгийн хүчтэй пуужинд тооцогддог NASA-гийн Space Launch System (SLS) пуужингийн хүчнээс бараг хоёр дахин илүү юм.
Өчигдрийн туршилтаар Starship хамгийн өндөр хурдаараа буюу 26,000 км/цаг хурдаар нисэж, 200 гаруй километрийн өндөрт хүрсэн байна.
Улмаар дэлхийн тойрог замын тал орчмыг туулсныхаа дараа алгуур доошилж, Энэтхэгийн далайн харалдаа агаар мандалд орж иржээ.
Гэвч далайн түвшнээс дээш 65 км өндөрт хүрэх үедээ пуужин удирдлагын төвтэй холбоо тасарсан байна. Пуужин далайн усан дээр газардах сүүлчийн шатандаа ийнхүү сүйрчээ.
“Starship олон гараг дамнасан амьдралыг бий болгоно” гэж SpaceX-ийн үүсгэн байгуулагч Илон Маск сошиал хуудсандаа бичээд туршилт ахиц дэвшил авчирсныг онцолсон байна.
Пуужингийн эхний туршилтыг 2023 оны дөрөвдүгээр сард гүйцэтгэхэд хөөрөөд хэдхэн минутын дотор дэлбэрч байв.
2023 оны арваннэгдүгээр сард хоёр дахь удаагаа туршихад өмнөхөөсөө ахиж, пуужин, хурдасгуур хоёр салж чадсан ч хоёул дэлбэрсэн юм.
NASA 2026 онд сансрын нисгэгчдээ саран дээр буулгах төлөвлөгөөтэй байгаа. Ингэхдээ Starship пуужингийн өөрчилсөн хувилбарыг ашиглахаар төлөвлөжээ.
Хятад улс 2030 онд сансрын нисгэгчдээ саран дээр буулгахаар төлөвлөсөн. Тиймээс SpaceX компанид пуужингаа бүтээж дуусгах тийм ч урт биш хугацаа үлдээд байна.
Эх сурвалж: AFP
