Монгол Улсад тохиолдоод буй зудын хүндрэл бэрхшээлийг даван туулахад зориулан ОХУ-аас 8,500 тонн тэжээлийн буудайг хүмүүнлэгийн тусламжаар олгохоор шийдвэрлэсэн.
Уг хүмүүнлэгийн тусламжийг Оросын тал Алтанбулаг хилийн боомтоор авто тээврээр хүргүүлэх бөгөөд тусламжийн эхний цуваа өчигдөр ирсэн болохыг ОХУ дахь Монгол Улсын ЭСЯ-наас мэдээлжээ.
Буриад улсын талаас өгсөн мэдээллээр ОХУ-ын Монгол Улсад үзүүлж байгаа хүмүүнлэгийн тусламж нь 8.5 мянган тонн хүчит тэжээл, 425 машин ачааны тээврийн зардлын хамтаар нийт 166.6 сая рубль буюу 1.85 сая ам долларын тусламж болж байгаа бөгөөд хилээр татваргүй, хялбаршуулсан байдлаар нэвтрүүлэхээр шийдвэрлэжээ.
