СӨҮЛ, 2024 оны гуравдугаар сарын 18 /Yonhap/. Умард Солонгосын тал өнөө өглөө Зүүн тэнгис рүү ойрын тусгалтай баллистик пуужин харвасан гэж Өмнөд Солонгосын арми мэдэгдлээ. АНУ-ын Төрийн нарийн бичгийн дарга Энтони Блинкен сайд нарын бага хуралд оролцохоор Сөүлд хүрэлцэн ирээд байгаа энэ үед пуужин харважээ. Өмнөд Солонгосын Зэвсэгт хүчний Штабуудын дарга нарын нэгдсэн хорооноос мэдээлэхдээ, өнөө өглөөний 07:44 цагийн орчимд Умард Хванхэ мужийн Санвон тойргоос ойрын тусгалтай бололтой баллистик пуужин харвасныг илрүүллээ хэмээгээд өөр дэлгэрэнгүй мэдээлэл өгөөгүй байна.
“Дахин пуужин харваж болзошгүй байгаатай холбогдуулан манай арми сонор сэрэмжээ нэмэгдүүлж, анхааралтай ажиглаж байна. Бид Умард Солонгосын баллистик пуужин харвасантай холбоотой мэдээллийг АНУ, Японы эрх баригчидтай солилцохын зэрэгцээ бэлэн байдлыг бүрэн хангаж байна” гэж Штабуудын дарга нарын нэгдсэн хорооноос мэдээлжээ.
Харин Японы Батлан хамгаалах яам Умард Солонгосын хоёр баллистик пуужинг илрүүлсэн гэж мэдээлээд пуужингууд тус улсын эдийн засгийн онцгой бүсийн гадна унасан бололтой гэв. Умардын тал хоёрдугаар сарын 14-нд зүүн эргээсээ “Падасури-6” гэдэг “газар-далай ангиллын” шинэ далавчит пуужинг харваснаас хойш сар орчмын дараа пуужин харвалаа. Тус улс энэ он гарсаар хоёр дахь удаагаа баллистик пуужин харваж байгаа нь энэ бөгөөд эхнийх нь нэгдүгээр сарын 14-нд дуунаас хурдан цэнэгт хошуу тээсэн хатуу түлшээр ажилладаг дунд зайн тусгалтай баллистик пуужинг туршсан байна. Пёньян энэ онд далавчит пуужингийн туршилтыг таван удаа хийсэн нь илрүүлж, устгахад хэцүү зэвсгийн системүүдтэй холбоотой болгоомжлолыг улам нэмэгдүүлж байна.
Умард Солонгосоос учрах цөмийн болон пуужингийн аюул заналын эсрэг тогтоон барих хүчийг бэхжүүлэхэд чиглэсэн “Эрх чөлөөний бамбай” нэртэй Сөүл, Вашингтоны хамтарсан сургуулилалт дууссанаас хэд хоногийн дараа дээрх туршилтыг хийжээ.
Умард Солонгосын зүгээс холбоотнуудын цэргийн сургуулилалтыг улс орных нь эсрэг довтлох бэлтгэл сургуулилалт хэмээн зэмлэн буруушаасаар ирсэн бол Сөүл, Вашингтон уг мэдэгдлийг няцааж, зөвхөн хамгаалахад чиглэгдсэн гэж мэдэгдсээр ирсэн байна. Өнөө өглөө Э.Блинкен дэлхийн 30 гаруй орны засгийн газрын өндөр түвшний төлөөлөгчид оролцдог Ардчиллын төлөөх дээд хэмжээний уулзалтад оролцохоор Сөүлд хүрэлцэн иржээ.
Э.Хулан
Эх сурвалж: "Монцамэ" агентлаг
