Төв Цэнгэлдэх хүрээлэнгийн мэдэлд 1999 оны 5 дугаар сарын 4-ний А72 захирамжаар 386000 ам.метр буюу 38,6 га газрыг спортын зориулалтаар олгосон ч өнөөдрийг байдлаар 12.6 га газар л үлджээ. 27 га газрыг нь бусдад дараах байдлаар шилжүүлж өгсөн байна.
- 2005 онд НЗД-ийн 399 дүгээр захирамжаар Даариймаа, Жалан-Аажав, Б.Батбаяр, Б.Баярмаа, Сарантуяа, Э.Жаргалан, Э.Батзаяа нарт 3500 ам.метр газрыг амины зориулалтаар эзэмшүүлэхээр шилжүүлсэн.Одоо газар дээрээ хашаатай НЗД-ийн 2021 оны А572 дугаар захирамжаар Альба Мунда гэдэг компанид эзэмших эрхийг шилжүүлсэн 3697 ам.метр газрыг 15 жилийн хугацаатай олгосон.
- НЗД-ын 2007 оны 397 дугаар захирамжаар Рапид харш компанид 40 мянган ам.метр газрыг үйлчилгээ орон сууц конторын зориулалтаар эзэмшүүлэхээр эрх шилжүүлсэн бөгөөд тус газраас 20 мянган ам.метр газрыг НЗД-ын 2008 оны 379 дүгээр захирамжаар тум зориулалтаар Бумбын шовх компанид шилжүүлсэн.
НЗД-ын 2017 оны 243 дугаар захирамжаар газар эзэмших эрхийг сунгасан. 2019 оны 3 сарын 18-ны өдөр дуудлага худалдааны анхны үнэ төлөх график байгуулан урьдчилгаа 100 сая төгрөг төлсөн ч гэрээ байгуулснаас хойш мөнгө төлөөгүй.
- НЗД-ын 2008 оны 415 дугаар захирамжаар орон сууц, конторын зориулалтаар 27500 ам.метр газрыг эзэмшүүлэхээр Урбанланд компанид 8000, Модернтаун компанид 10 мянган ам.метр, “Хаус инвест “ компанид үлдсэн хэсгийг олгосон. Үүнээс Модернтауны газар орон сууцны хотхон баригдсан.
- НЗД-ын 2009 оны 394 дүгээр захирамжаар үйлчилгээ орон сууцны зориулалтаар эзэмшүүлэхээр 40 мянган ам.метр газрыг Блюпропертис ХХК-д, иргэн Даваахүүд 6000 ам.метр талбайг шилжүүлсэн. “Блюпропертис” ХХК нь НДЗ-ын 2015 оны 561 дүгээр захирамжаар “Апартмент KG” компанид 7951 ам.метрийг эзэмшүүлэхээр шилжүүлж орон сууц баригдсан.
- 2009 оны 672 дугаар захирамжаар үйлчилгээ, орон сууц, конторын зориулалтаар “Биг кастл” ХХК-д 5000 ам.метр талбайг, Мөнх Улз ХХК-д 5000 ам.метрийг шилжүүлсэн. Тус газар дээр орон сууц баригдсан. НЗД-ын 2012 оны 12 дугаар сарын 1142 захирамжаар МөнхУлз ХХК нь газраа МОН-АСА ХХК-д шилжүүлсэн.
- 2011 оны 114 дүгээр захирамжаар орон сууцны зориулалтаар 8000 ам.метр газрыг Мөнхсан ХХК-д шилжүүлсэн. Тус компани НЗД-ын 2016 оны захирамжаар хугацаагаа сунгасан.
- 2015 оны А561 дүгээр захирамжаар БТС-ын зориулалтаар 4551 ам.метр газрыг “RBTH” ХХК-д эрх шилжүүлсэн. Тус компани газар дээрээ ямар нэгэн үйл ажиллагаа явуулаагүй. НЗД-ын 2021 оны 391 дүгээр захирамжаар газар эзэмших эрхийн хугацаа дуусгавар болсон учраас сургууль цэцэрлэг барихаар шилжүүлсэн.
НЗД-ын 2017 оны 561 дүгээр захирамжаар “Зүүнтариа” ХХК-д биеийн тамир спортын зориулалтаар 891 ам.метр газар шилжүүлснийг НЗД-ын захирамжаар зориулалтыг контор болгон өөрчилж, газрын хэмжээг 611 ам.метр болгож өөрчилсөн. НЗД-ын 2021 оны А67 дугаар захирамжаар газар эзэмших гэрчилгээг хүчингүй болгож, 2021 оны 139 дүгээр захирамжаар АТГ-т 851 ам.метр газрыг шилжүүлсэн.
“Төв цэнгэлдэх хүрээлэн” ХХК-ийн захирал Т.Нямдаваагийн хэлснээр, анх Н.Багабанди Ерөнхийлөгч асны хоёр хүүхэд, “Эрэл”-ийн Эрдэнэбатын 2 хүүхэд, Жалан-Аажав гуайн гэр бүл гээд долоон айлд НЗД-ын захирамжаар газар олгосноор энэ замбараагүй газар олгох явц эхэлсэн байна.
Toim.mn
