Даваа гарагт АНУ-ын Вашингтон мужийн захирагч Жэй Инсли тайчигчдын ажлын байран дахь эрхийг хамгаалах хуулийг баталжээ.
Уг хууль нийт АНУ даяар цоо шинэ жишиг болж байгаа юм.
“Тайчигчид бол ажил хөдөлмөр эрхлэгчид, тэд бусад бүх салбарын ажиллах хүчтэй ижил эрх ашгаа хамгаалуулдаг болж байна” гэж хуулийн төслийг санаачилсан Вашингтон мужийн сенатор Ребекка Салдана мэдэгджээ.
Шинэ хуулийн дагуу ажил олгогч клубүүд ганцаарчилсан үйлчилгээ үзүүлэх хэсэгтээ онцгой тохиолдолд тусламж дуудах товч байрлуулах ёстой болсон байна.
Бас тусгай бэлтгэгдсэн хамгаалалтын ажилтнуудтай байх үүрэг хүлээжээ.
Ажил олгогчдын тайчигчидтай байгуулах хөдөлмөрийн гэрээнд тавигдах шаардлагуудыг хуульд нарийн тусгаж өгсөн байна.
Тухайлбал тайчигчийн олсон орлогоос клубүүдийн авах шимтгэлийн хязгаарыг тогтоож өгчээ.
Ийм нэмэлт арга хэмжээнүүдээ санхүүжүүлэхэд нь туслах зорилгоор тайчих клубүүдэд согтууруулах ундаа зарах эрх өгсөн байна.
Вашингтон муж нь тайчих үзүүлбэрийн үйл ажиллагаа явуулдаг шөнийн клубүүдэд согтууруулах ундаа зарахыг хориглодог ховор сонин журамтай байсныг шинэ хуулиар ийнхүү өөрчилжээ.
“Согтууруулах ундааны үйлчилгээ нь клубүүдийг илүү аюулгүй, тэгш хүртээмжтэй болгодгийг тайчигчид болон шинжлэх ухааны үндэслэлтэй судалгаанууд баталдаг. Бүжигчид ажлаа шударга, аюулгүй, нэр хүндээ сэвтээлгэхгүй орчинд явуулах эрхтэй” гэж хуулийг боловсруулахад хамтарч ажилласан “Strippers are Workers” хөдөлгөөний мэдэгдэлд өгүүлсэн байна.
Сүүлийн жилүүдэд газар газрын тайчигчид эрхээ хамгаалуулахаар идэвхтэй тэмцэж эхлээд байгаа.
Энэ оны нэгдүгээр сард Шинэ Зеландын тайчигчид ажиллах хөдөлмөрлөх эрхээ баталгаажуулж, салбартаа шинэчлэл нэвтрүүлэхийг шаардан парламентын ордны гадна жагсаж байв.
Өнгөрсөн онд Лос-Анжелес хотын нэг бааранд тайчигчид өөрсдийгөө хөдөлмөрийн мөлжлөгөөс хамгаалахын тулд үйлдвэрчний эвлэл байгуулснаа зарлаж байжээ.
Эх сурвалж: AFP