ХУД-ийн III хороо, Говийн авто замыг “Мишээл экспо”-ийн замтай холбоно. Гэтэл уг ажлыг “Эрэл” компани 800 метр газар чөлөөлөх гэж жил гаруй хугацаанд саатуулан нийтийн эрх ашгийг хохироож байна.
Өнгөрсөн дөрөвдүгээр сард тус компанийн ашиглахаа больсон төмөр замыг албадан чөлөөлсөн юм. Тэгвэл өнөөдөр үлдсэн хэсэг газрыг чөлөөлж, замын ажлыг эхлүүлэхээр болжээ.
Энэ талаар хотын дарга Х.Нямбаатар “Эрэл”-ийн Б.Эрдэнэбат Монголын ард түмний бүх л боломжийг насан туршдаа идэж, хэрэглэж эцэс сүүлд нь гадаадын казинод тоглож байна. Төв цэнгэлдэх хүрээлэнг тойрсон газар Б.Эрдэнэбатынх, зүүн дөрвөн замыг тойрсон газар бүгд Б.Эрдэнэбатынх, хотын өнгөтэй өөдтэй бүх газрууд “Эрэл”-ийн Б.Эрдэнэбатын мэдэлд байна.
“Эрэл”-ийн Б.Эрдэнэбат СОТ хоёрыг бас л авсан. Монголын ард түмний хүртэх ёстой бүх шимийг нь хүртсэн атлаа шүүхийн шийдвэр гарсан байхад яагаад 800 метр газар чөлөөлдөггүй юм. Нийслэлийн Замын хөгжлийн газар болон Газар зохион байгуулалтын албаныхан өнөөдөр техниктэй очиж, газрыг нь чөлөөлж ажлаа эхлүүлнэ. Нийтийн эрх ашиг нэгдүгээрт байх ёстой” гэв.
Мөн “Уламжлалт анагаах ухааны элэг судлалын клиник төв” болон Ж.Хатанбаатарын өмч хөрөнгөтэй холбоотой асуудлыг цэгцэлж дуусгах аж. “НЗДТГ-ын харьяа нэртэй Элэг судлалын төв юм бол төвийн даргыг хот томилох ёстой. Эзэн нь юмаа мэдэж эрэг нь усаа хашъя. Хоёр корпусын нэгийг нь хүүхдийн эмнэлэг болгоно. Нөгөө корпусыг нь элэг судлалын хамгийн сүүлийн мэргэжлийн баг хамт олон менежмент удирдлагыг нь хэрэгжүүлээд явах хэрэгтэй. Одоо энэ мэт өмчийн асуудалд нялцганаад яваад байж болохгүй” гэдгийг хотын дарга Х.Нямбаатар хэллээ.
