“Эмээлт”-ийн өмхийрсөн махны хэрэг сураг алдрахтай зэрэгцээд “Эрдэнэт үйлдвэр”-ийн уурхайчдад өмхий махтай хоол нийлүүлсэн байж болзошгүй гэх мэдээлэл цацагдаж эхэллээ. Мэргэжлийн хяналтын байгууллагыг татан буугдаагүй байхад эхэлсэн “Эмээлт”-ийн махны хэрэг одоо ч шийдэгдээгүй байна. Тэр бүү хэл одоогоороо ч өмхийрсөн махаа боловсруулж, бүтэгдэхүүн болгоод зах зээлд нийлүүлж байж болзошгүй ноцтой мэдээлэл хөвөрдөг. Тэгвэл “Эрдэнэт үйлдвэр”-ийн уурхайчдад хоол нийлүүлдэг “Оддөл” компанийнхан өмхий махаар хоол хийж, үйлчилгээнд гаргасан байж болзошгүй гэнэ.
Тодруулбал, уурхайчдын хэлж буйгаар “Тавдугаар сарын 7-нд “Оддөл” компанийн хоолны газраас өдрийн хоолондоо мантуун буузны сет сонгосон. Гэтэл энэ хоол нь идэхийн аргагүй, өмхий үнэртэй байсан. Мах нь өмхийрч, муудсан учраас идэх ямар ч арга байгаагүй. Энэ өдөр ширхгийн хоол буюу мантуун бууз, хуушуурын сет сонгосон уурхайчид мэдэж байгаа. Дараагийн өдөр нь ч өмхий махтай байна гэх яриа гарч байсан. Гэхдээ хордлогод орж, эмнэлгийн тусламж авсан хүн байхгүй. Өмхий үнэр үнэртэж байсан учраас хоолоо идсэн байхгүй” гэх мэдээллийг өгч байгаа аж.
Харин эх сурвалжийн мэдээлж буйгаар “Оддөл” компанийн агуулгахад байсан хонь, ямааны 60 гулууз мах өмхийрсөн байж болзошгүй гэсэн. Өөрөөр хэлбэл, өнгөрсөн намар дарж, хадгалсан мах нь өмхийрч, муудсан юм шиг байна лээ. Гэтэл өмхийрч, муудсан махаа хаяхгүй уурхайчдын хоолонд нийлүүлэхээр болсон гэсэн. Тус компанийнхан удирдлагын түвшинд уг асуудлыг хэлэлцэж, өмхийрсөн махаа хэрэглээнд нийлүүлэх үүрэг өгсөн гэсэн. Гэтэл тогооч нар нь дургүйцэж, хоолны хордлого гарвал асуудал үүснэ гэдгийг хэлсэн юм билээ. Тэгээд энэ асуудал олон нийтийн сүлжээнд цацагдсан. Уг мэдээлэл гарахтай зэрэгцээд “Оддөл” компанийн удирдлагууд өмхийрсөн махаа гал тогоо болон агуулахаасаа нүүлгэн шилжүүлж, хувийн зуслан, эдлэндээ нуусан байж болзошгүй” гэлээ.
Өөр нэг эх сурвалжийн мэдээлж буйгаар “Оддөл” компанийнхан өмхийрсөн байж болзошгүй махаа тавдугаар сарын эхний долоо хоногт Эрдэнэт хотын постоор оруулж ирсэн байх магадлалтай. Үүнийг шалгаж, илрүүлье гэвэл постны хяналтын камерын бичлэгийг шүүгээд илрүүлэх боломжтой. Үнэхээр махаа зөөсөн байна уу, үгүй юу гэдэг нь тэндээс тодорхой болно. Гэхдээ “Оддөл” компанийн захирал Ш.Давааням нь “Эрдэнэт үйлдвэр”-ээс гаралтай, ашиг сонирхлын зөрчилтэй хүн учраас уг асуудлыг нуун дарагдуулаад өнгөрч болзошгүй. Түүнийг хамгаалдаг хүмүүс үйлдвэрийн удирдлагын түвшинд ажилладаг байх магадлалтай. Ш.Даваанямын компани давуу эрхтэйгээр “Эрдэнэт үйлдвэр”-ийн тендерийг хамдаг. Бүүр хоёр компаниараа тендерт оролцож, давуу эрх эдэлдэг гэх мэдээлэл бий” гэв.
Энэ талаар бид хэд хэдэн уурхайчнаас мэдээлэл авахаар холбогдсон боловч тэд “Мэдээлэл өгвөл удирдлагын зүгээр дарамт, шахалт үзүүлдэг. Бүүр ар гэрийнхнийг нь хүртэл сүрдүүлж, дарамталдаг байж болзошгүй. Ийм учраас уурхайчид хэвлэл мэдээллийн хэрэгсэлд хандаж чадахаа больсон. Дуугарвал ажилгүй болох учраас хэн хоолноосоо салахыг хүсэх вэ дээ. Гэхдээ өмхий махаар хоол хийж өгсөн гэх асуудлыг холбогдох байгууллагаас нь шалгаж байгаа юм билээ” гэх тайлбарыг өгч байсан юм.
Ж.МӨНГӨНШАГАЙ: “ОДДӨЛ” КОМПАНИЙН МАХНААС ДЭЭЖ АВЧ, ШИНЖИЛГЭЭНД ӨГСӨН
Бид энэ асуудлаар “Эрдэнэт үйлдвэр” ТӨҮГ-ын Үйлдвэрчний эвлэлийн холбооны даргад Ил уурхайн Үйлдвэрчний эвлэлийн хорооны дарга Ж.Мөнгөншагайтай холбогдож тодрууллаа.
Ж.Мөнгөншагай “Өмхийрсөн махаар хоол хийсэн эсэхийг одоогийн байдлаар тогтоогоогүй байна. “Оддөл” компанийн хөрөгчнөөс дээж авч, шинжилгээнд явуулсан. Шинжилгээний хариу гараагүй байгаа учраас одоогоор тодорхой мэдээлэл өгч чадахгүй байна. Ямартай ч өмхийрсөн махаар уурхайчдад хоол хийж өгсөн гэх мэдээлэл гарсан даруйд хоол үйлчилгээ явуулдаг хэсэгт нэвтэрч, махнаас нь дээж авсан. Хөлдүү мах байсан учраас өмхий эсэх нь мэдэгдэээгүй. Хөлдүү учраас үнэртээд мэдэх боломжгүй юм билээ. Уурхайчдаас хордлогод орсон, эрүүл мэндийн байдалд нь сөргөөр нөлөөлсөн гэх мэдээлэл ирээгүй байна. Өмнө нь ийм асуудал болж байгаагүй. Шинжилгээний хариу гарсны дараа уг асуудлын талаар эргээд хариу хэлнэ. Ямартай ч шалгалтын ажиллагаа үргэлжилж байна” гэлээ.
М.БАТМӨНХ: АЖЛЫН ХЭСЭГ ГАРГАЖ, ШАЛГУУЛНА
Мөн бид энэ асуудлаар “Эрдэнэт үйлдвэр”-ийн захирал Г.Ёндон, Д.Үүрийнтуяа, Хамтын ажиллагаа, нийгмийн асуудал эрхэлсэн Тамгын газрын дарга Ц.Бат-Энхээс энэ асуудлаар тодруулах гэсэн боловч утсаа аваагүй юм.
Харин “Эрдэнэт үйлдвэр”-ийн Ерөнхий инженер Т.Батмөнхтэй холбогдоход “Энэ асуудлыг шалгаж, хянадаг хэлтэстэй. Хамтын ажиллагаа, нийгмийн асуудал эрхэлсэн шалгаж, хянахаас гадна хоол зүйч байнга ажиллаж байдаг. Ямартай ч уг мэдээллийн дагуу Ажлыг хэсэг гаргаж, хяналт шалгалт явуулна” гэв.
Уг асуудлыг хянаж, уурхайчдыг хамгаалж байх үүрэгтэй Хамтын ажиллагаа, нийгмийн асуудал эрхэлсэн хэлтсийн дарга Ц.Бат-Энх сураггүй “алга” болжээ. Мэдээлэл авах гэж хэдэнтээ оролдсон ч тэрбээр утсаа аваагүй юм. Улс даяар хэмнэлтийн горимд шилжиж, дарга нар Улаанбаатар хотод том оврын автомашин унах эрхгүй болж байсан. Гэтэл зарим сайд, дарга онгоцоор томилолт хэсэхдээ хэд хэдэн суудал захиалдаг болох нь “Эрдэнэт” үйлдвэрийн орлогч дарга Ц.Бат-Энхийн үйлдлээр ил болж байлаа. Тодруулбал, “Эрдэнэт” үйлдвэрийн орлогч дарга Ц.Бат-Энх Турк руу нисэхдээ “Бизнес ангиллын хоёр суудал авч, унтаад явна” гэсээр төсвийн мөнгөөр хоёр суудал захиалж, тансагласан нь баримтаар ил болж байсан юм билээ. Хууль зөрчиж, хэмнэлтийн хуулийг уландаа дэвслээд зугаалж байсан, УИХ-ын гишүүн байхдаа үнэг хөөж байгаад онгоц унагасан “Симба” Батаагийн бага дүү Ц.Бат-Энх уурхайчдыг хамгаалах нь “үлгэр” болох бололтой.
Ergelt.mn
