УИХ-ын 2024 оны сонгуульд нэр дэвшигчдийг судалж, үзье гэвэл үгүй мөн тойвтой ажил болжээ. Сонгогчид өөрсдийнхөө тойргийн нэр дэвшигчдийг уулзаж үзээд ч юм уу, ямархуу байрын хүн бэ гэдгийг мэдчихэж байгаа юм. Харин бусад тойрогт очиж, судалгаагаа үргэлжлүүлье гэвч сонгуулийн сурталчилгаа дуусах нь.
Интернет ухаад үзсэн ч хомс мэдээлэл байх авч албан ёсны мэдээллийн цахим хуудаснуудыг гол барин уншиж үзвээс өрсөлдөх чадвараараа есөн дүүргээс сүүл мушгисан гэхээр огт өрсөлдөх чадваргүй болсон Налайх, Багануур, Багахангай дүүрэгт бас л бүтэхгүй “гарууд” оччихоод санал гуйгаад явна лээ.
Тус наймдугаар тойрогт багтсан Багануур, Налайх дүүргийн АН-ын дарга нар хүчтэй сөрөг хүчин байж чадаа ч үгүй. Саяхан дөө, манай экс байсан Ц.Элбэгдорж, хамаарал бүхий этгээдийнхээ хамт Эрдэнэтээс мөнгө завшсан гээд л нэр холбогдоод авсан. Энэ үйлдвэрийн болохгүй, бүтэхгүйтэй хамт нэрээ дуудуулж явдаг нэг хэргийн эзэн бас байна. Налайх, Багануур, Баганхангайн наймдугаар тойрогт нэр дэвшигч Д.Алтанхуягийг гэж болох юм. Мань эр 14 жилийн өмнө “Зэс эрдэнийн хувь” компанийг байгуулснаасаа өгсүүлээд нэлээд хэл ам таталсан.
Орхон аймгийн гучин мянга гаруй хүнээс мянга, мянган төгрөг татаж, Эрдэнэт үйлдвэрийн ашигласан шороон овоолгыг шигшиж, зэс боловсруулах үйлдвэр байгуулсан ч цугларсан мөнгөөрөө нутгийн төдийгүй төвийн зурагт, сонин хэвлэлийг худалдаж аваад тархи угаах ажиллагаагаа уйгагүй явуулаад дуусгачихсан ч гэдэг.
Эрх ашигтаа тохируулан жагсаал цуглаан зохион байгуулахдаа амтшиж, нөгөө мөнгөө өгсөн иргэдийг хувьцаагаа ав гэж дуудаж, жагсаалд нэгдэхийг уриалж, 600 сая төгрөг босгосон ч сонгуульдаж орхисон зальжин гэдэг. Залуухан бөх байхдаа Япон явсан ч сумогоос нь хөөгдөж ирээд зурагтаар арлын бөхийн тэмцээн тайлбарлаж, нэлээд танигдаад авсан ч гэх юм билээ. Эрдэнэтийнхнийг мадалж ирсэн шигээ нэр суу арх халх даяар тархсан нэг үйл явдал АН-ын дарга асан С.Эрдэнэтэй холбогддог. Тус намын 17-р их хурал хоёр жилийн өмнө болсон. Энэ үеэр АН-ын ердийн гишүүн л байсан Д.Алтанхуяг С.Эрдэнэтэй маргалдаж, даргыгаа нульж, хурлын тайзны шалыг арчиж орхисон юм даа. Одоо ч интернет орчинд бичлэг нь бий.
Үүгээр ч зогсохгүй хагарсан намынхан нь эвлэрье гээд хурал хийхэд С.Эрдэнийг араандаа зууснаа харуулж, бах мэлхийгээр нь дуудаж, орон гэрийг нь шатаана гэж заналхийлсэн. Нэгэн цагт С.Эрдэнийн баруун гар болчихсон таахалзаж явсан хүн дээ.
Нэр дэвшигчдийг нэг бүрчлэн судлахад маш хүндрэлтэй байгаа талаар дээр дурдсан. Үнэхээр шүүгээд үзээд өгье гэсэн ч намтар байтугай гарч ирэх мэдээлэлгүй нэг хүн бол даргыгаа зоддог Д.Алтанхуягтай тойргоо хөгжүүлнэ гээд иргэдтэй уулзаж, уянгалж яваа Ганаагийн Цамбагарав. Үнэндээ л их сургууль төгссөн, одоо Багануурын АН-ын дарга нь үнэн гэснээс өөр харуулчих намтар түүнд алга. Ямартай ч хагас тэрбум гаруйн хөрөнгөтэй, хоёр ч компанид хамааралтайгаа мэдүүлсэн нь яамай даа. Аан тийм, өмнөх сонгуульд Багануурын унаган хүү гэж нэр дэвшсэн ч гарч чадаагүй л юм байна билээ. Өмнөх сонгуулиудаар АН-ынхан энэ тойрогт гарсан ч өнөөдөр өрсөлдөх чадваргүй алслагдсан тосгод шиг болчихоод байхад алдагдсан жилүүдийг одоо нөхөж чадах нь юу л бол.
