Хангарьд ордны хойд талд байрлах Хөдөлмөрийн ордны байранд дотоод, гадаад иргэдийн тролл баг ажиллаж байна гэх иргэний мэдээллийн дагуу

Нэгүүн.мн сайтын сурвалжлах баг газар дээрээс нь шууд дамжуулалтаар мэдээллийг хүргэлээ. Тухайн нөхцөл байдлын тухайд олон залуучууд 2, 3 дугаар давхруудын өрөөнд компьютер дээр ажиллаж байсан ба зарим нь зугтаж, өөр өрөөнд үлдсэн хүмүүс нь хаалгаа дотроос нь цоожилсон байдалтай байв.

Энэ талаар Үндэсний эвслийн гишүүн Д.Пүрэвдаваа тайлбар өгч нэр дэвшигчдийн ухуулагч, шадар туслахууд хууль ёсны дагуу ажиллаж байгаа гэсэн бол тэндээс зугтаж гарсан хоёр иргэн 1.5 сая төгрөгөөр “сэвээний ажил” хийж байсан гэв. Харин 2 давхрын цонхоор үсрэхийг оролдсон, нойлын өрөөнд орж нуугдсан зэргээр зугтаах гэсэн хүмүүсийн шалтгааныг тодруулахад эвслийн гишүүн Д.Пүрэвдаваа болон хуульч О.Батхүү нар тодорхой хариулт өгөөгүй бөгөөд тус эвслийн зүгээс уг үйл явдлыг зохион байгуулалттай үйл ажиллагаа хэмээн мэдэгдэж байна.

Ямартай ч УИХ-ын сонгуулийн хууль бус үйл ажиллагаа явуулж байгаа эсэхийг шалгуулахаар Нэгүүн.мн сайтын сурвалжлах баг цагдаагийн байгууллагад дуудлага өгснөөр цагдаагийн бүрэлдэхүүн хойшлуулашгүй шалгалтын ажиллагааг эхлүүлж, штабын гэх дээрх байранд явагдаж байгаа үйл ажиллагааг зогсоож битүүмжлээд байна.

Цагдаагийн байгууллагаас өгч буй мэдээллээр одоогоор тухайн байранд олон тооны компьютер, техник, тоног төхөөрөмжийг суурилуулан олон тооны иргэд байрласан асуудал тогтоогдсон. Үүнд гэмт хэрэг, зөрчлийн шинж байгаа эсэх, ямар үйл ажиллагаа явуулж байсан зэргийг тогтоохоор шалгалтын ажиллагааг үргэлжлүүлж байна. Тогтоогдсон нөхцөл байдлын талаар илүү дэлгэрэнгүй мэдээллийг өгөх боломжгүй гэлээ.