Монгол Улсын Ерөнхий сайд Л.Оюун-Эрдэнэ өчигдөр Засгийн газрын бүтцийн тухай болон Засгийн газрын бүрэлдэхүүний тухай хуулийн төслийг УИХ-ын дарга Д.Амарбаясгаланд өргөн барилаа.

Засгийн газар нь Ерөнхий сайдаас гадна 22 сайд, 16 яамтай ажиллахаар болсон юм.

Үүнд:

1.Монгол Улсын Ерөнхий Сайд

2. Монгол Улсын Тэргүүн Шадар сайд бөгөөд Эдийн засаг, хөгжлийн сайд;

3. Монгол Улсын Шадар сайд /онцгой байдлын асуудал эрхэлсэн/;

4. Монгол Улсын Шадар сайд /өрсөлдөөний асуудал эрхэлсэн/;

5. Монгол Улсын сайд, Засгийн газрын Хэрэг эрхлэх газрын дарга;

6. Монгол Улсын сайд, Хяналт, үнэлгээний Үндэсний хорооны дарга;

7. Монгол Улсын сайд, 20 минутын хот-Үндэсний хорооны дарга;

8. Монгол Улсын сайд, Боомтын сэргэлтийн Үндэсний хорооны дарга;

9. Гадаад харилцааны сайд;

10. Сангийн сайд;

11. Шударга ёс, хууль зүй, дотоод хэргийн сайд;

12. Аж үйлдвэр, эрдэс баялгийн сайд;

13. Соёл, спорт, аялал жуулчлал, залуучуудын сайд;

14. Батлан хамгаалахын сайд;

15. Байгаль орчин, уур амьсгалын өөрчлөлтийн сайд;

16. Боловсролын сайд;

17. Гэр бүл, хүний хөгжлийн сайд;

18. Зам, тээврийн хөгжлийн сайд;

19. Хот байгуулалт, барилга, орон сууцжуулалтын сайд;

20. Хүнс, хөдөө аж ахуй, хөнгөн үйлдвэрийн сайд;

21. Цахим хөгжил, инновац, харилцаа холбооны сайд;

22. Эрчим хүчний сайд;

23. Эрүүл мэндийн сайд;

Мөн хэд хэдэн яамдын нэрийг сольжээ. Энэ нь ямар ч үр ашиггүй зардлыг л нэмэгдүүлэх бөгөөд Хууль Зүй, Дотоод Хэргийн Яамыг Шударга ёс, Хууль Зүй, Дотоод Хэргийн яам гэж нэрийг нь сольсонтой холбоотойгоор гэхэд л бүх төрлийн хаяг солих, хэвлэмэл болон бусад материалуудыг шинэчлэх гэсэн ямар ч ач холбогдолгүй зүйлд төсвийн мөнгө зарцуулагдаж таарна. Гэтэл Монголд шударга ёсыг тогтоохын төлөө тухайн яамны сайд, хамт олон өөрсдөө хуулийг чандлан мөрдөх нь л чухал болохоос бус Шударга Ёсны Яам гэж өөрсдийгөө нэрлэх эсэх нь яг үнэндээ ямар ч ач холбогдолгүй шүү дээ.

Мөн хяналт үнэлгээ хариуцсан яамгүй сайдын орон тоог нэмжээ. Түүнчлэн энэ Засгийн Газар Монгол Улсын түүхэн дэхь хамгийн олон шадар сайдтай Засгийн Газар болох нь.

Тодруулбал Монгол Улсын Шадар сайдын орон тоог дахин нэгээр нэмж, харьяа агентлагийг нь хоёр хуваан хариуцуулахаар болсон байна. Энэхүү ямар ч үр ашиг, тооцоо судалгаагүй, ард түмний мөнгийг хий дэмий үрсэн шийдвэрийн шалтгаан нь ердөө л Лу.Гантөмөр, Т.Доржханд нарын хүсэлтэй холбоотой аж. Учир нь тэд хоёулаа зөвхөн Шадар Сайд л болж гэмээн, Засгийн Газарт хамтран ажиллана гэсэн байна.

Иймээс Монгол Улсын Шадар Сайд бөгөөд Эдийн Засгийн Хөгжлийн Сайдаар Лу.Гантөмөрийг томилохоор болж.

Үлдсэн Шадар сайдаар Т.Доржхандыг томилох гэтэл нэг асуудал үүсчээ. Тэр нь С.Амарсайхан. Хэрэв С.Амарсайханыг албан тушаалгүй үлдээвэл тэр гомдох бөгөөд энэ нь улс төрийн нөхцөл байдлыг хурцатгах үр дагавартай. Учир нь тэрээр энэ Засгийн Газар дахь Д.Амарбаясгалангийн фракцийн гол төлөөлөл. Иймээс ердөө л С.Амарсайханыг гомдоож болохгүй гэсэн шалтгаанаар Монгол Улсын Шадар Сайдын орон тоог дахин нэгээр нэмсэн байна.

Э.Мягмар