Үндэсний их баяр наадамд дөрөв болон түүнээс дээш давсан бөхөөс допингийн шинжилгээг авдаг. Монголын үндэсний допингийн эсрэг байгууллагаас шөвгөрч үлдсэн 32 бөх, үндэсний сурын харвааны найман эрэгтэй, эмэгтэй нийт 48 тамирчны допингийн сорьцыг Герман улсын Дрезден хотын лабораторид шинжлүүлж, 48 цагийн дотор хариуг нь авах тухай холбогдох албаныхан мэдээлээд байсан юм.

Энэ талаар Монголын үндэсний допингийн эсрэг байгууллагын Ерөнхий нарийн бичгийн дарга Н.Ариунзаяа "Үндэсний их баяр наадмын хуулиар олгосон үүргийнхээ хүрээнд Монголын үндэсний допингийн байгууллага баяр наадмаар барилдаж байгаа үндэсний бөхийн шөвгийн 32 бөхөөс, сурын харвааны 16 тамирчнаас допингийн шинжилгээ авдаг. Допингийн эсрэг олон улсын конвенцийн дагуу энэ бүх процесс явагдана. Дөрвийн даваа даваад, тавын даваанд өвдөг шороодсон бөхчүүдээс ч шинжилгээ авна.Өнөөдөр 30 хяналтын ажилтан ажиллаж байна.

Шээс хольдог гэх хардлага олон нийтийн дунд байдаг. Ямар ч тийм боломжгүй. Шинжилгээ авах байрыг цагдаагийн хамгаалалтад авсан.

Тамирчинд нэг удаагийн хэрэглээний шуудгийг өмсгөж допингийн шинжилгээ авдаг нь сорьцыг солих боломжгүй юм. Бэлдсэн сорьцын сав, уух усыг тамирчин өөрөө сонгоно. Сорьц өгөх үйл ажиллагааг хяналтын ажилтнаас гадна тагнуул, цагдаа, АТГ-ын төлөөлөл байж шалгадаг. Сорьцыг тээвэрлэх хүмүүс ч сургалтад хамрагдсан байдаг. Допингийн шинжилгээ өгөх гэж буй тамирчны биед гаднын ямар нэг зүйл байгаа эсэхэд үзлэг хийнэ. Шинжилгээ өгөх өрөө буюу 00-ын өрөөнд хяналтын камер тавих боломжгүй.

Харин өрөө рүү орж, гарч хүнийг хянана. Тамирчин сорьцын хоёр сав дээр бичигдсэн нэрийг иргэний үнэмлэхтэйгээ тулгана, бүрэн бүтэн байдлыг шалгаж, лацадна. Үүний дараа хөргөгчид хадгалдаг. Допингийн эсрэг дүрмийн олон улсын стандартын дагуу тамирчин хүн өөрийн биед хориглосон бүтээгдэхүүнийг оруулахгүй байх үүрэгтэй. Хадгалагдсан сорьцыг хуулийн байгууллагынхан хянасан хэвээр байна. Долоодугаар сарын 12-ны шөнөдөө тамирчдаас допингийн шинжилгээг авч дуусдаг. Сорьцыг өглөө "Чингис хаан" нисэх онгоцны буудалд байгаа тусгай чиг үүргийн байгууллагын төлөөлөлд хүлээлгэж өгснөөр Герман улсын Дрезден хотын лабораторид хүргэж өгнө. Хэдийгээр амралтын өдөр ч тус хотын лаборатори ирсэн үед нь шинжилгээ хийнэ гэдгээ мэдэгдсэн. 48 цагийн дотор шинжилгээний эхний хариуг Монголын үндэсний Допингийн эсрэг байгууллага болон бөхийн салбар хороонд ирүүлэх юм. Өөрөөр хэлбэл 32 бөхийн допингийн шинжилгээний эхний хариу 48 цагийн дотор гарах юм. Одоогоор эхний хэсгийн шинжилгээг авч дуусаж байна гэж мэдэгдсэн" гэлээ.