АНУ-ын Ерөнхийлөгч, АН-аас АНУ-ын Ерөнхийлөгчид нэр дэвшээд байсан Жо Байден Ерөнхийлөгчийн сонгуулийн сунгаанаас нэрээ татаж байгаагаа өчигдөр зарлалаа.
Жо Байден энэ тухайгаа: "Энэ шийдвэр намын болон улс орны эрх ашигт бүрэн нийцнэ гэж би бодож байна. Би Ерөнхийлөгчийн сонгуульд нэрээ дэвшүүлэлгүй, бүрэн эрхийнхээ үлдсэн хугацаанд өөрийн бүх эрч хүчийг төвлөрүүлэн ажиллахаар шийдлээ” гэсэн юм.
Мөн тэрээр 59 настай, АНУ-ын Дэд Ерөнхийлөгч Камала Харрисыг АНУ-ын Ерөнхийлөгчид сонгуульд нэр дэвшүүлэхийг АН-ынханд уриалж,
"2020 онд намаас нэр дэвшсэн миний хамгийн анхны шийдвэр бол Камала Харрисыг дэд Ерөнхийлөгчөөр сонгох явдал байв. Энэ бол миний гаргасан хамгийн зөв шийдвэр байсан. Камала энэ жил манай намаас нэр дэвшихийг бүрэн дэмжиж байгаа бөгөөд та бүхэн ч гэсэн дэмжээсэй гэж хүсч байна. Ардчилсан намынхан бид нэгдэж, Трампыг ялах цаг болжээ. Үүнийг хийцгээе." гэсэн байна.
АНУ-ын Ардчилсан Намын үндэсний чуулган сар хүрэхгүй хугацааны дараа болох юм.
С.Сарнай
