Монгол Ардын нам, Ардчилсан нам, ХҮН намын хооронд 2024-2028 онд хамтран ажиллах санамж бичиг байгуулан, улмаар Монгол Улсын 33 дахь Ерөнхий сайд Л.Оюун-Эрдэнэ Засгийн газрын гишүүнийг томилох тухай захирамж гаргаад хорь орчим хоногийн хугацаа өнгөрч байна. Одоогийн байдлаар
Монгол Ардын нам, Ардчилсан нам, ХҮН намын хооронд байгуулах гэрээний төсөл боловсруулагдаж дууссан бөгөөд 8-р сарын дунд гэхэд эцэслэн батлахаар яригдаж буй аж.
Үүнээс гадна шинээр томилогдсон сайдууд яамныхаа бүтцийг зурж, улмаар томилгоогоо ярьж эхэлжээ.
Албан ёсоор бол яамны Төрийн Нарийн Бичгийн Даргаас эхлээд хэлтсийн дарга хүртлээ төрийн албан хаагч байдаг. Гэхдээ шинээр томилогдсон сайд ямар нэг аргаар ядаж л Төрийн Нарийн Бичгийн Даргаас Газрын дарга хүртэл улс төрийн томилгоо хийж, багаа бүрдүүлдэг нь нууц биш.
Энэ ч жишгээр шинээр томилогдсон сайдууд томилгоогоо тун удахгүй хийх аж.
АН-ын квотоор Засгийн Газарт орж ажиллах болсон сайд нарын хувьд томилгоо хийхдээ намынхаа удирдлагатай зөвшилцөх учиртай юм гэнэ. Энэ ажил ид үргэлжилж буй бөгөөд зарим томилгоо ч урьдчилсан байдлаар яригдаж эхэлсэн байна.
Жишээлбэл АН-ын дэд дарга, хуульч Ч.Өнөрбаярыг Хууль Зүй, Дотоод Хэргийн Яамны Төрийн Нарийн Бичгийн Даргаар ажиллуулах нь зөв гэдэгт АН-ын удирдлага ба УИХ-ын гишүүн, Хууль Зүй, Дотоод Хэргийн сайд О.Алтангэрэл нар санал нэгджээ.
С.Сарнай
