Аймаг, нийслэл, сум дүүргийн ИТХ-ийн 2024 оны сонгууль хэдхэн хоногийн дараа эхлэх гэж байна. Үүнтэй холбоотойгоор НИТХ-ын сонгуульд МАН, АН, ХҮН намаас нэр дэвшигчид урьдчилсан байдлаар тодорхой болоод буй билээ. Нийслэлийн Сонгуулийн хороо намуудаас ирсэн нэрсийг нягтлан, үнэмлэх олгосноор тэд албан ёсоор нэр дэвшигч болно.
НИТХ-д нэр дэвшүүлсэн байдлаас харахад МАН-ын нэр дэвшилтийг 70 хувийг Нийслэлийн Засаг Дарга бөгөөд Улаанбаатар хотын захирагч, Нийслэлийн МАН-ын хорооны дарга Х.Нямбаатар, Нийслэлийн Засаг дарга асан, МАН-ын Нарийн Бичгийн Дарга Д.Сумьяабазар нар шийдсэн ба мөн Монгол Улсын Ерөнхий Сайд Л.Оюун-Эрдэнэ, ЗГХЭГ-ийн дарга Н.Учрал, ЕТГ-ын дарга Г.Занданшатар болон УИХ-ын зарим нэр бүхий гишүүдийн төлөөлөл 30 хувьд нь багтаж буй юм.
Харин АН-ын хувьд нийт нэр дэвшигчдийн 75 хувийг Монгол Улсын Ерөнхийлөгч асан, УИХ-ын гишүүн, МоАХ-ы дарга Х.Баттулгын хүмүүс бүрдүүлжээ.
Нийслэлийн АН-ын дарга Т.Батцогтоос эхлээд Х.Баттулгын төрсөн дүү Х.Баттуулын хүү Б.Оргилбат, “Хиам консервийн үйлдвэр” компанийн захирал Б.Бадмаа, “Талх чихэр” ХК-ийн Санхүү хариуцсан захирал Б.Бурмаа, УИХ-ын гишүүн Л.Мөнхбаясгалангийн "Цензургүй яриа" багийн сэтгүүлч асан Ж.Баттуул гэх мэтээр энэ нэрс үргэлжилнэ.
Харин үлдсэн 25 хувьд нь УИХ-ын гишүүн, Тэргүүн Шадар Сайд, Эдийн Засгийн Хөгжлийн Сайд, АН-ын дарга Лу.Гантөмөр, АН-ын дарга асан С.Эрдэнэ, ШИНЭ намын төлөөлөл багтсан байна.
Энэ тохироог Х.Баттулга УИХ-ын 2024 оны сонгуулийн нэр дэвшүүлэлтийн өмнө Л.Гантөмөртэй хийсэн байх магадлалтай гэнэ.
Иймээс ч НИТХ-д АН ялж олонхи болвол Нийслэлийн Засаг Дарга бөгөөд Улаанбаатар хотын захирагчаар хэн ажиллахыг "Женко" Х.Баттулга өөрөө сонгох ажээ.
Э.Мягмар
