“Нийслэлд Х.Нямбаатар хэрэгтэй юу. Хэрэггүй бол “Женко”, “Зи” хоёрын аль нэг “хүүхэлдэй”-г хотын дарга болго” гэвэл өнөөдөр хэн ч байсан “Х.Нямбаатар нь дээр ээ” л гэнэ.
Гэвч улс төрийн газрын зураг дээр Х.Нямбаатарыг ялагдуулахаар зураад эхэлсэн бололтой. Ирэх 12 дугаар сард хамтарсан Засгийн газрыг огцруулах юм гэнэ гэсэн яриа гараад эхэлснээс харахад энэ тун ч холоос төлөвлөж буй ажил бололтой. Тэгэхээр тайлбарлах гээд үзье. Хэрэв Л.Оюун-Эрдэнийн Засгийн газрыг огцруулъя гэвэл юун түрүүнд нийслэлд ялагдуулах учиртай.
Ингэж байж МАН-ын дарга, Ерөнхий сайд Л.Оюун-Эрдэнэтэй хариуцлага ярих барьцтайхан сэдэвтэй болно. Дээр нь нийслэлийн МАН-ын хороог Х.Нямбаатараас мулталж авах нь гарцаагүй.
Хоёрдугаарт, хотоос Х.Нямбаатарыг зайлуулж чадаагүй үед Засгийн газрыг огцрууллаа гэхэд шинээр томилогдох Ерөнхий сайд төрийн хийгээд намын албан тушаалыг өөрийн багаар байгуулж чадахгүйд хүрнэ. Тиймээс энэ удаагийн НИТХ-ын сонгуульд МАН ялагдах нь “нэг сумаар хоёр туулай буудах” ач холбогдолтой юм. МАН-ынх нь нөхдөд шүү дээ.
Харин эндээс хэн хожих вэ гэвэл өдгөө Ардчилсан намаас нийслэлийг бараг өрх тусгаарлуулчихаад байгаа Х.Баттулга. Түүний лайвчид төрийн сэнтийд заларч Ардын намын захиалагчдынхаа хүслийг гүйцэлдүүлнэ. Дээр нь одоо л нэг эвэндээ ороод ажил нь урагшлах гэж байсан нийслэл хэмээх их айлыг хэрүүл тэмцэл, хулгай зэлгийн замбараагүй нөхцөлд оруулах биз. Ер нь Женко хэмээх Х.Баттулга хэмээх улс төрч хувь замналаараа энэ улсад хэрэгтэй юм нэгийг ч хийгээгүй хүн. Харин ч үймээн шуугиан зохион байгуулах дээрээ гаршсан. Энэ өөрийнх нь хүсэл зорилго уу, аль эсвэл гадаадын хүчин зүйлийн гар хөл болж хийдэг юм нь уу гэдгийг өнөөхөндөө таахад бэрх.
Эргээд сэдэв рүүгээ ороход энэ бүхнээс хэн хожих гээд байна вэ. Хотын удирдлагыг хүртэл тавьж туугаад, нийслэлчүүдийн эрх ашгийг 4 жилээр ухраан байж хожоо хайж байгаа нь тэгвэл хэн юм бэ. Ардын намын цагаан ордноор тархсан шуумаар бол Н.Учрал, Д.Амарбаясгалан, С.Амарсайхан тэргүүтэй нөхөд гэнэ. Тэд нам дотроо хийгээд төрийн албан тушаалын цулбуурыг авахад тээг садаа болсон Л.Оюун-Эрдэнэ, Х.Нямбаатар нарыг нэг цохилтоор зайлуулахад НИТХ-ын энэ удаагийн сонгуулийн үр дүн маш чухал хэмээн үзэж буй аж. Эхлээд нэгдмэл дайснаа дарах дараа нь дундаа учраа олох бодолтойгоор Х.Баттулгын багийг дэмжиж эхэлжээ. Тийм ч учраас өнөөдөр НИТХ-ын сонгуульд Х.Нямбаатар ба бусад хэмээн хуваагдаад байгаа гэсэн үг. Уг нь Ардын нам Х.Нямбаатарын буянаар л өнгөрсөн зун УИХ-ын сонгуульд олонх болсон юм шүү дээ.
Д.Дандархүү
