Мэргэжлийн боксын “WBA”, “KBF”, “WBO” холбооны аварга, Өмнөд Солонгосын мэргэжлийн боксын “Samsung” клубийн тамирчин, Өмнөд Солонгосын аварга, ОУХМ Ганбаатарын Баярхүүтэй ярилцлаа. Тэрбээр саяхан 11 дэх тулаандаа ялалт байгуулан, “WBO” холбооны Ази тивийн аварга болсон юм.

-Мэргэжлийн боксын "WBO" холбооны аваргын бүсийг хүртсэнд баяр хүргэе.

-Та сайн байна уу. Танд их баярлалаа.

-Миний дүү өөрийгөө танилцуулахгүй юу?

-Намайг Ганбаатарын Баярхүү гэдэг.

-Аль нутгийн хүүхэд вэ?

-Би Сүхбаатар аймгийн Түмэнцогт суманд төрж, өссөн. Бага нас минь хөдөө өнгөрсөн, айлын отгон хүүхэд.

-Боксын спортыг анх сонгон хичээллэх болсон шалтгаан юу байв?

-Манайх 2010 онд хөдөөнөөс Улаанбаатар хот руу орж ирсэн. Тэр үед ээж, аав хоёр намайг дагуулж боксын “Ширэн бээлий” клубт очсон. Тэгээд боксын Монгол Улсын гавьяат дасгалжуулагч Д Төрбат багшийн шавь болгон, боксын спорт руу оруулж өгсөн.

-Сонирхогчдын боксоор хэдэн жил хичээллэж байгаад мэргэжлийн бокс руу шилжсэн бэ?

-Сонирхогчдын боксоор 12 жил хичээллэсэн. Боксын Улсын шигшээ багийн тамирчин байсан. Тэгээд 2023 оноос мэргэжлийн боксын тамирчин болсон. Анх боксоор хичээллэж эхэлсэн цагаас мэргэжлийн боксын тамирчдын тулааны бичлэг их үздэг болсон. Ер нь мэргэжлийн боксын тамирчин болно гэж бодож явдаг байлаа.

-Яагаад мэргэжлийн боксыг сонгон хичээллэх болов?

-2022 онд Өмнөд Солонгосын мэргэжлийн боксын “Самсунг” клубээс санал ирсэн. Тэдний саналыг хүлээн зөвшөөрч мэргэжлийн боксын спортод хөл тавьж орсон.

-Сонирхогчдын боксын ДАШТ, олимпын наадамд тулалдах мөрөөдөл бий юу?

-Сонирхогчдын боксоор ер нь олон улс, тив, дэлхийн тэмцээнд орж үзсэн болохоор одоо ахиж тулалдах бодол байхгүй.

-Мэргэжлийн боксын “WBA”, “KBF”, “WBO”холбооны аварга болжээ. Эдгээр холбоод Өмнөд Солонгосын мэргэжлийн боксын холбоо юм уу. Ази тивийн болон дэлхийн мэргэжлийн холбоод байна уу?

-Миний одоо тулалдаж байгаа эдгээр холбоод бүгд дэлхийн шилдэг холбоонууд байгаа.

- “WBO” холбооны аваргын бүсийг хүртсэн анхны Монгол боксчин болсон гэв үү?

-Миний хувьд сая дэлхийн шилдэг “WBO” холбоонд, жингийнхээ дэлхийн шилдэг чансаа, ранкын 15-д орсон байгаа. Одоо тэгээд ранкаа улам урагшлуулаад “WBO” холбооны дэлхийн аваргын бүсний төлөө тулалдах гэж байгаа. Монгол Улсаас боксчдоос анх удаа “WBO” холбооны бүсийг хүртсэн. Тус холбоонд тулалдаж байгаа анхны монгол тамирчин болсон байгаа.

-Мэргэжлийн рингэнд одоогоор хамгийн хүнд, ширүүн тулааныг ямар улсын боксчинтой хийж байв. Боксын спортын ямар зэрэг цолтой вэ?

-Мэргэжлийн боксын рингэнд амархан тулаан гэж байхгүй. Миний мэргэжлийн рингэнд хийсэн 11 тулаан хийгээд байгаа. Тэр бүх тулаан хүнд, ширүүн өрсөлдөөнтэй, өрсөлдөгчид ширүүн, хүчтэй байсан. Сонирхогчдын боксын Олон улсын хэмжээний мастер цолтой.

-Мэргэжлийн боксод хэдэн тулаан хийж, хэдэн ялалт авав. Үүнийг хэдийг нь хүнд цохилтоор аваад байна вэ?

-Мэргэжлийн боксын рингэнд 11 тулаан хийж, дараалан 11 ялсан амжилттай яваа. Эдгээр 11 тулааны есөн тулааныг хүнд цохилтоор ялсан байгаа.

-Сонирхогчдын болон мэргэжлийн боксоор гаргасан амжилтууддаа сонирхуулахгүй юу?

-Сонирхогчдын боксын Монгол Улсын хоёр удаагийн аварга. УАШТ-ээс хоёр алт, дөрвөн мөнгө, дөрвөн хүрэл медаль хүртэж байлаа. Орос Казах, Хятад, Тайландын олон улсын тэмцээн болон Европ тивийн цуврал тэмцээнүүдээс алт, мөнгө, хүрэл медалиуд авч байсан. Мэргэжлийн боксоор Бүх Солонгосын аварга , мэргэжлийн боксын дэлхийн шилдэг холбоо “WBA” Ази тивий аварга , мөн дэлхийн шилдэг холбоо “WBO” холбооны Ази тивийн аварга. Монгол Улсаас анхны “WBO” холбооны бүстэй тамирчин болсон.

-Одоо дараагийн хүсэл мөрөөдөл, зорилт, зорилго юу байгаа вэ?

-Одоо би нэг их удахгүй 12 дахь чухал тулаанаа хийх гэж байгаа. Дараагийн том зорилго гэвэл “WBO” холбооныхоо чансааны эхний тав руу орж “WBO” холбооны дэлхийн аваргын бүсний төлөө тулалдах зорилт байна. Тэр сайхан цол бүсийг монгол хүн авч чаддаг гэдгийг харуулахыг хүсэж байгаа. Намайг урьж оруулсан танай хамт олонд баярлалаа. Удахгүй дахиад олон сайхан мэдээтэй холбогдох болно.