Ам нээх бүрдээ “Тог хязгаарлана, тэг зогсох, тэс хөлдөх аюул ойрхон байна” гэж “айлгадаг” Эрчим хүчний сайд Б.Чойжилсүрэн чухам ямар хүмүүсээр эрчим хүчний төрийн өмчит компаниудаа удирдуулж байгааг бид цувралаар танилцуулж байгаа. Энэ удаад Б.Чойжилсүрэнгийн 10 жилийн найз, “Эрчим хүчний үндэсний төв” ТӨХК-ийн гүйцэтгэх захирал Д.Бямбасүрэнг танилцуулахаар бэлтгэлээ.

Эрчим хүчний яамны харьяа “Эрчим хүчний үндэсний төв” ТӨХК нь гэж бий. “Эрчим хүчний үндэсний төв” ТӨХК нь улсын төсөв болон гадаадын хөрөнгө оруулалт, зээл, тусламжаар эрчим хүчний салбарт хэрэгжүүлэх төслүүдэд хяналт тавих үндсэн чиг үүрэгтэй байгууллага. Өөрөөр бол, Засгийн газраас ирэх дөрвөн жилд Тавантолгойн дулааны цахилгаан станц, Эрдэнэбүрэн, Эгийн усан цахилгаан станц тэргүүтэй эрчим хүчний мега төслүүдийг хэрэгжүүлэхээр болсон. Тэгэхээр энэ мега төслүүдийн хэрэгжилтэд “Эрчим хүчний үндэсний төв” ТӨХК хяналт тавина гэсэн үг. Товчхондоо, эрчим хүчний салбарын толгой компани гэж ойлгож болно.

Тэгвэл “Эрчим хүчний үндэсний төв” ТӨХК-ийн гүйцэтгэх захирлаар Дашын Бямбасүрэн гэгч ажилладаг. Харин Д.Бямбасүрэн гэгч нь Эрчим хүчний сайд Б.Чойжилсүрэнгийн 10 жилийн найз бөгөөд Б.Чойжилсүрэнгээс хөтөлж, хормойдон, түүнээс албан тушаал авч ирсэн нэгэн ажээ.

Б.ЧОЙЖИЛСҮРЭН НАЙЗ Д.БЯМБАСҮРЭНГЭЭ САНГИЙН САЙД БАЙХДАА ТӨРИЙН БАНКНЫ ОРЛОГЧ ЗАХИРЛААР ТОМИЛЖ БАЙСАН БОЛ ЭРЧИМ ХҮЧНИЙ САЙД БОЛМОГЦОО “ЭРЧИМ ХҮЧНИЙ ҮНДЭСНИЙ ТӨВ” ТӨХК-ИЙН ГҮЙЦЭТГЭХ ЗАХИРЛААР ТОМИЛЖЭЭ

“Эрчим хүчний үндэсний төв” ТӨХК-ийн гүйцэтгэх захирал Д.Бямбасүрэн хэрхэн төрд албан тушаал авч ирснийг ойлгомжтойгоор тайлбарлъя.

Нэгдүгээрт, Д.Бямбасүрэн нь Увс аймгийн уугуул. 1988 онд Увс аймгийн Улаангом хотын 10 жилийн II сургуулийг Эрчим хүчний сайд Б.Чойжилсүрэнтэй хамт төгссөн. Өөрөөр бол, Д.Бямбасүрэн, Б.Чойжилсүрэн хоёр 10 жилийн найзууд гэсэн үг.

Хоёрдугаарт, 2016 оны УИХ-ын сонгуулийн дараа Б.Чойжилсүрэн Сангийн сайдаар томилогдсон. Улмаар Б.Чойжилсүрэн Сангийн сайдын тамгаа авснаасаа сарын дараа найз Д.Бямбасүрэнгээ Сангийн яамны харьяа Төрийн банкны орлогч захирлаар томилсон байдаг. Тухайн үед Төрийн банкны орлогч захирал Д.Бямбасүрэн сард 10 сая төгрөгийн цалинтай байсан.

Гуравдугаарт, 2017 оны есдүгээр сард Ж.Эрдэнэбатын Засгийн газар огцорч, Б.Чойжилсүрэн Сангийн сайдын сэнтийгээсээ буусан. Түүнийг дагаад Д.Бямбасүрэн ч Төрийн банкны орлогч захирлын албан тушаалаа өгч байв.

Дөрөвдүгээрт, 2022 оны наймдугаар сарын 30-нд Б.Чойжилсүрэн Эрчим хүчний сайдаар томилогдсон. Ингээд яг сарын дараа буюу 2022 оны есдүгээр сарын 29-нд Б.Чойжилсүрэн найз Д.Бямбасүрэнгээ өөрийн Эрчим хүчний яамны харьяа “Эрчим хүчний үндэсний төв” ТӨХК-ийн гүйцэтгэх захирлаар томилсон байдаг. Эхэнд дурдсанчлан, “Эрчим хүчний үндэсний төв” ТӨХК нь улсын төсвийн хөрөнгөөр болон гадаадын хөрөнгө оруулалт, зээл, тусламжаар эрчим хүчний салбарт хэрэгжүүлэх төслүүдэд хяналт тавих үүрэгтэй, эрхтэй том байгууллага. Тэгэхээр Б.Чойжилсүрэн найз Д.Бямбасүрэнгээ асар том зорилготойгоор зориуд “Эрчим хүчний үндэсний төв” ТӨХК-ийн гүйцэтгэх захирлаар томилсон дүр зураг харагдаж байгаа юм.

“ЭРЧИМ ХҮЧНИЙ ҮНДЭСНИЙ ТӨВ” ТӨХК-ИЙН ГҮЙЦЭТГЭХ ЗАХИРЛАР Д.БЯМБАСҮРЭН БОГДХАН УУЛЫН НҮХТИЙН АМАНД 2.0 ГА ГАЗАРТАЙ, ТУС ГАЗАР ДЭЭРЭЭ ХАУС ХОТХОН БАРЬЖ БАЙНА

Эрчим хүчний сайд Б.Чойжилсүрэнгийн 10 жилийн найз, “Эрчим хүчний үндэсний төв” ТӨХК-ийн гүйцэтгэх захирал Д.Бямбасүрэн нь жилд 622 сая төгрөгийн орлоготой, 4.7 тэрбум төгрөгийн гурван орон сууц, нэг зуслангийн хаустай, 2.2 тэрбум төгрөгийн хадгаламжтай, 350 сая төгрөгийн үнэт эдлэлтэй, 1.2 тэрбум төгрөгийн авлагатай, нэг төгрөгийн ч өр зээлгүй нэгэн. Өөрөөр бол, төрийн өмчит компаниудын захирлуудыг Д.Бямбасүрэн хөрөнгөөрөө тэргүүлдэг.

Гол асуудал нь, Ерөнхий сайд Л.Оюун-Эрдэнэ, Хотын дарга Х.Нямбаатар хоёр Дархан цаазат Богдхан уулын аманд “аялал жуулчлалын отог” нэрээр баригдсан хаус хотхонуудыг цэгцлэх, барьж худалдсан эздэд нь хариуцлага тооцох, хууль хяналтын байгууллагуудад өгч шалгуулах тухай сүүлийн хоёр жил ярьж байгаа. Эргэн сануулбал, 2023 оны аравдугаар сард Ерөнхий сайд Л.Оюун-Эрдэнэ Төрийн ордны индрээс “Нийслэл хот маань авлигын билэг тэмдэг болсон цементен ширэнгэ болж хувирлаа. Газрын наймаа, тэндээс баяжсан улс төрийн бүлэглэл, барилгаа бариад зөвшөөрлөө гаргуулдаг авлигын соёлыг бид хэзээ хүртэл тэвчих вэ. Байгалийн тусгай хамгаалалттай газарт сүндэрлэсэн тансаг хотхонуудыг бид хэзээ болтол жуулчдын отог гэж нэрлэх вэ. Их хотын идээ бээрийг шахах зайлшгүй шаардлага тулгарч байна” гэж мэдэгдэж байв.

Тэгвэл Эрчим хүчний яамны харьяа “Эрчим хүчний үндэсний төв” ТӨХК-ийн гүйцэтгэх захирал Д.Бямбасүрэнгийн “Ойн хөндий” ХХК нь ХУД-ийн 23-р хороо, Богдхан уулын Нүхтийн аманд 1.0 га, “Тайгын хөндий” ХХК нь 1.1 га газартай. Д.Бямбасүрэн Богдхан уулын Нүхтийн амны энэхүү зэргэлдээ 2.1 га газар дээрээ хаус хотхон барьж байгаа ажээ.

Тайлбар: Д.Бямбасүрэнгийн Нүхтийн амны 1.0 болон 1.1 га талбайтай, зэргэлдээ 2.1 га газар

Тайлбар: Д.Бямбасүрэнгийн Нүхтийн амны 2.1 га газар дээрээ барьж буй хаусууд

Сонирхуулахад, Д.Бямбасүрэнгийн энэхүү хаус хотхон нь “Эрдэнэс тавантолгой” ХК-ийн гүйцэтгэх захирал асан Б.Ганхуягийн “нүүрсний хулгай”-н мөнгөөрөө барьж байсан орон сууцны хотхоны урдхан талд байрладаг юм байна.

Нэгтэж харвал, хэт тансаг хэрэглээтэй, хагартлаа хөлжсөн дарга нарыг төрөөс “зайлуулах” Засгийн газрын шүгэл, шүүр, шилэн ажиллагаанууд Д.Бямбасүрэнг тойрчээ. Мөн Богдхан уулын амуудын “аялал жуулчлалын отог” нэртэй хаус хотхонуудын эзэдтэй хийх Засгийн газар, Хотын захиргааны хамтран тэмцэл ч Д.Бямбасүрэнг алгассан харагдаж байна. Тэгвэл өнгөрөгч долоо хоногт УИХ, Засгийн газраас “Эрчим хүчний реформ”-ыг эхлүүлсэн. Энэ хүрээнд эрчим хүчний төрийн өмчит компаниудын удирдлагуудыг “цэгцлэх” асуудал яригдаж байна. Харин энэхүү реформоор Д.Бямбасүрэнг хэрхэхийг харах л үлдэж байна.