Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүд Орост тун ээлгүй байна. Оросын зэвсэгт хүчин стратеги–оперативын нөөцөө шавхан байлдаж байна. Орос орон тэснэ тэснэ гэхэд яаж тэсэх вэ гэсэн шиг Z-патриотууд шөвөлзөөд босоод ирсэн, Орос орон их хямралын босгон дээр байгаа тухай оросын албан ёсны мэдээллээс хөрвүүлж буулгая. Оросууд өөрсдөө тэгж ярьж байна.
Орос-Украины дайны нэг онцлог байна. Оросууд ялагдаж бүтэлгүйтэж цохиулж байгаагаа ард түмнээсээ шувтан нууж худлаа ярина. Украины бүх дроныг устгасан гэж мэдэгддэг ч байдал дээр гал түймэр, суунагласан хар утаа, олон өдөр шатаж дуусдаггүй нефтийн баазууд гэх мэт тэдний бүх юм нь хуурамч.
Хуурамч мэдээллээр иргэдээ ч, Путинээ ч хуурна. Путин нь бас буцааж нийгмээ хуурна. Дэлхийг хуурах гэж цөхрөнө. Гэвч хуурмагийг сөрөх хандлага Орост түгсээр байна. Төрийн Думын депутат асан, “имперец” хочтой, эсвэл “хар хурандаа” гэж алдаршсан Виктор Алкснис эх орныхоо уналт нуралтын тухай ойрд Telegram канал-д байнга бичих боллоо:–Путин биднийг шившигтэйгээр бууж өгөх зүг рүү хөтлөж байна, Орос орон магадгүй алга болж ч мэднэ хэмээн Z-хурандаа Алкснис анхааруулжээ. Украины эсрэг дайндаа Орос ялагдвал гунигт ирээдүй тосон авна. Хэрэв Украинтай энх тайвны хэлэлцээр байгуулбал тэр нь оросын Z-эх орончдыг паникт оруулна. Ерөөсөө улс орны удирдлага өөрсдөө урвачихаад байна.
ОХУ-ын Зэвсэгт хүчин тун “гунигт ой”-г тэмдэглэж байна. Хэргээр Путинд сануулъя. Тэр бидэнд амлаж байсан. Гэтэл Украины батлан хамгалах хүчин ОХУ-ын хилийг давж ороод Курск мужийн нэг хэсэгт хяналтаа тогтоогоод яг гурван сар болж байна. Тэндээ бэхжчихсэн гэжээ.
Оросын хэт эх оронч (ультрапатриот) Алкснис Курскийн байлдааныг Кремлийнхэнд сануулсан, тэгэх тусмаа дайн ОХУ-ын нутаг дэвсгэрт ороод ирсэн хэмээн хатуухан сануулсан анхны зүтгэлтнээр тодорч байна. Экс-депутат цааш нь бичжээ. Хил хязгаараа хамгаалж, Украины зэвсэгт хүчнийг хөөж гаргах чадвар Оросын армид алга. Үүнд тус улсын цэрэг-улс төрийн удирдлага хариуцлага хүлээх ёстой. Курсктээ Украины цэргийг оруулаад гурван сар болдог, үнэхээр маш гунигт ой шүү. Энэ чинь хуучин Оросын унаган уугуул нутаг дэвсгэр биз дээ. Халдан орж ирсэн Украины цэргийг богино хугацаанд бутцохино гэж бидэнд манай удирдагчид амлаад байсан, амлаад байсан, тэр нь бүтэх болов уу, бүтээсэй гээд бид хүлээгээд байсан, хүлээгээд байсан, хүлээлтийн цаад хязгаар дууслаа гэж хар хурандаа цухалдан бичжээ.
Өнгөрсөн 4 дүгээр сарын 23-нд хурандаа Алкснис бүр ноцтой анхааруулга өгч байжээ. Цэргийн тусгай ажиллагааны дараа ОХУ алга болно, биднийг хуваагдал, задрал хүлээж байна хэмээн сэтгэл түгшиж бичиж байсан нь сайтуудад хадгалагджээ. Украин дахь дайндаа Орос ялагдаж байна. Үүнийг Кремль мэдэхгүй, ёстой яахаа мэдэхгүй байна. Энэ дайны бүтэн хоёр жил хагас өнгөрлөө. Оросын Z-эх орончдын эгнээнд ялагдлын сэтгэхүй төлөвшиж бэхжлээ, гүн суулаа.
Орос орон суларч байна, Орос орон нурж унах магадлалтай байна хэмээн “Сталинград” гэх суртал ухуулгын сайтад Алкснис зоригтой дуугарч байжээ. Бүр задлан ярьжээ. Оросын ПВО (агаарын довтолгооноос эсэргүүцэн хамгаалах зэвсэг) абсолютно үр ашиггүй ажиллаж байна.
Пуужин ч тэр, цохилтын дрон ч тэр, алинаас нь ч оросуудаа хамгаалах чадвар алга. Украин нь хүссэнээрээ ОХУ-ын цэргийн объектуудад идэвхтэй цохилт өгч, бүр өдөр болгон тогтмолжлоо. Тогтмол дэглэмээр цохидог боллоо. Крымыг эзэлснийхээ төлөө оросууд маш их зовлон амсаж байна. Учир нь Украины зэвсэгт хүчин төлөвлөгөөтэйгээр оросын зенитийн пуужингуудыг цохиж, тус хойгт оросын цэргийн хүчнийг бүрмөсөн бутцохих хөрсөө бэлтгэж байна. Манай ПВО тэдний пуужингийн аюултай тэмцэхэд хүчин мөхсөдлөө. Ганц пуужин ч биш, нисэгчгүй цохилтын төхөөргийн өөдөөс яаж ч чадахгүй байна. Бодит байдал ердөө ийм л байна. Манай ПВО үүргээ биелүүлж чадахгүй байна–Алкснис цухалдан бичжээ. Оросын флот тун базаахгүй байгааг Z-хурандаа хүлээн зөвшөөрөөд “Манай Хар тэнгисийн флот яагаад энэ бүхэнд бэлэн байгаагүй юм бэ, Крым ба флотоо агаараас найдвартай эсэргүүцэн хамгаалах бэлтгэл яагаад хийгээгүй юм бэ? Хар тэнгисийн флот хэрэг дээрээ байлдааны талбараас зугтчихлаа. Одоо Крымээс бүр цаашлуулж ухраалаа, украины пуужингийн даяллаас холдууллаа. Хар тэнгисийн флот байлдааны нийт хөлөг онгоцныхоо гуравны нэгийг хэрэг дээрээ алдчихлаа, хоёр жилийн хагасын дотор шүү. Энэ мэдээж буруу. Гэхдээ энэ бол сүйрэл!” хэмээн ультрапатриот маань халаглан бичжээ.
Цааш нь. Одоо Оросын батлан хамгаалах хүч чадлын тухайд дааж баршгүй их асуудалтай тулгарлаа. Украины эсрэг дайн Орос орны сул доройг харууллаа. Манай ПВО, авиац, флотын хувьд энэ сулрал түгшүүрийн харанга боллоо. Харанга ч биш, байнга чарлан буй дуут дохио!
“Дайнд бүх зүйл сайн байна, яг л төлөвлөгөөний дагуу явагдаж байна гэж бид үздэг, бүр цаашаа баярлан тэмдэглэж Крещатикад ялалтын парад хүртэл хийсэн. Харин бодитойгоор бол Оросын төрт улсад бодит аюул занал улам өсөн нэмэгдсэн. Юу болоод байгааг би ойлгохоо байлаа”, “Дайн зогсоох, украины нутаг дэвсгэрийн зарим хэсгийг наймаалцах тухай Путины саналын эсрэг ганц Украин төдийгүй, Баруун ертөнц тэр чигтээ зогсож байна. Путиныг няцааж байна. Тэр ч бүү хэл Оросын том ах Хятад хүртэл Украины нутаг дэвсгэрийн бүрэн бүтэн байдлыг дэмжих тухай байнга онцлон тэмдэглэж байна” гэжээ.
Алкснисын эвгүй асуулт:–Энх тайван тогтоох нөхцлийг зөвхөн ялагч нь тулгадаг гэдгийг ойлгохгүй байна гэж үү? Цэргийн тусгай ажиллагааны бүсэд үүссэн нөхцөл байдалд ОХУ-ыг ялагч гэж үзэх үү? Украины эсрэг дайнд Орос цэргийн ялагдал хүлээж байгааг ажиглан харна гэж өр өвдмөөр гашуун юм. Оросын хувьд ялах шаанс зөвхөн 2022 оны хоёрдугаар сард л байсан, гэвч блицкриг нурсан. Оросын зэвсэгт хүчинд нэр төртэй зүтгэсэн амьд сэрүүн генералууд Цэргийн тусгай ажиллагааг төлөвлөсөн. Гэтэл биднийг тэр төлөвлөгөөгөөрөө сүйрэл рүү аваачсан гэдгийг тэд өөрсдөө ойлгохгүй байна гэж үү? Тэр сүйрэл Оросын сөнөлөөр дуусна, Орос улс дэлхийн газрын зурагнаас алга болно. Оросын ирээдүй гэж олон арван жижиг улсуудад хуваагдсан бутрал байх болов уу гэж бодож байна. Олон арван сая оросууд энэ нуралт, бутралыг тун тайван хүлээн авах болно хэмээн Z-патриот бичжээ.
Баримт юу харуулж байна вэ? Орос том зураглалаараа үхлээ өөртөө бэлтгэсэн, одоо ялах ямар ч найдваргүй, дээр нь эх орноо хэсэглэн хуваагдах аюулын өмнө чирч аваачаад байна. Үүнийг Z-патриот нүднээ буутал сэрэмжлүүлэн бичсэн нь харагдаж байна. Путин ахдаа шал дэмий итгэж горьдож, тэр нь санаснаар болохгүй хяслан биднийг ороогоод авлаа даа! Орос өдүүлсэн дайндаа уруудаж, улс нь ядарч, бидэнд илүүчлэх юмгүй болж буй хатуу хөтүү энэ хорвоог “орос ах”-гүйгээр туулах болох нь дээ, монголчууд минь!
Адьяaгийн Батсайхан (бэлтгэл хошууч)
