Хавдрын хуучин шар эмнэлэг нь ачааллаа дийлэхгүй, хавдрын шинэ эмнэлэгтэй болно гэж хий хүлээсээр суутал хорт хавдар хэдхэн хүний бизнес болж дууслаа. Жишээ нь, ХСҮТ-ийн урд талд нь Зам, тээврийн хөгжлийн сайд Б.Дэлгэрсайханы туслах Б.Баяржаргалын эзэмшдэг “Дөрөвдүгээр эмнэлэг” гэж бий. Хавдрынх. Харин ХСҮТ-ийн хойд талд нь Эрүүл мэндийн сайд Т.Мөнхсайханы зөвлөх Т.Буянтогтохын үүсгэн байгуулсан “Бриллиант” эмнэлэг гэж бий. Бас л хавдрынх. Тэгвэл ХСҮТ-ийн баруун талд нь “Юби онкомед” гэж бас нэг хавдрын эмнэлэг бий. Эзэн нь ХСҮТ-ийн Дэд захирал Ц.Уранчимэг. Тодруулбал, ХСҮТ-ийн Үйл ажиллагаа, эрдэм шинжилгээ эрхэлсэн Дэд захирал Ц.Уранчимэг ХСҮТ-ийн хашаан дотор хавдрын хувийн эмнэлгээ нээчихсэн, хувь, хувьсгалын хоёр эмнэлгийнхээ хооронд “тэлээ хурга” шиг гүйж яваа нэгэн. Одоо дэлгэрэнгүй танилцуулъя.

ХСҮТ-ийн Үйл ажиллагаа, эрдэм шинжилгээ эрхэлсэн Дэд захирал Цэгмидийн Уранчимэг нь нөхөр Энхжаргалын Баясгалангийн хамт “Энхбаясах” ХХК-ийг эзэмшдэг. Тэгвэл ХСҮТ-ийн Дэд захирал Ц.Уранчимэгийн “Энхбаясах” ХХК нь “Юби онкомед” гэх хавдрын эмнэлэг ажиллуулдаг. “Юби онкомед” хавдрын эмнэлгийн захирал, их эмчээр Ц.Уранчимэгийн нөхөр Э.Баясгалан нь ажилладаг. Нөхөр Э.Баясгалангийнх нь тухайд, 2020 оноос хойш Улсын нэгдүгээр төв эмнэлгийн Эрүүл мэндийг дэмжих төвийн даргаар ажиллаж байсан. Өнгөрсөн оноос Улсын нэгдүгээр төв эмнэлгийн Дүрс оношилгооны их эмчээр ажиллаж байгаа. Өөрөөр хэлбэл, Э.Баясгалан нь Улсын нэгдүгээрт төв эмнэлэг болон хувийнхаа “Юби онкомед” эмнэлэгт их эмчээр давхар ажилладаг гэсэн үг. Ер нь ч цайны цагийн дараа Улсын эмнэлгийн их эмч нарын ихэнх нь эзгүй байдаг нь нууц биш. Тэгэхээр тэдгээр хувь, хувьсгалын давхар ажилтай их эмч нарын нэг нь Э.Баясгалан гэсэн үг.

Харин ХСҮТ-ийн Дэд захирал Ц.Уранчимэгийн тухайд, ХСҮТ-ийн Ерөнхий захирал асан, УИХ-ын гишүүн Ж.Чинбүрэнгийн ойрын хүмүүсийнх нь нэг бөгөөд өнгөрөгч УИХ-ын сонгуулиар ч Ц.Уранчимэг эрүүл мэндийн салбарынхнаасаа Ж.Чинбүрэнг дэмжихийг онцгойлон "гуйж" явсан нэгэн аж.

Тайлбар: "Юби онкомед" хавдрын эмнэлгийн эзэд буюу ХСҮТ-ийн Дэд захирал Ц.Уранчимэг, УНТЭ-ийн Их эмч Э.Баясгалан

Тайлбар: УИХ-ын гишүүн Ж.Чинбүрэн, ХСҮТ-ийн Дэд захирал Ц.Уранчимэг

Гол нь, ХСҮТ-ийн Дэд захирал Ц.Уранчимэгийн “Юби онкомед” эмнэлэгт гурван ноцтой асуудал байна.

Нэгдүгээрт, ХСҮТ-ийн Дэд захирал Ц.Уранчимэгийн “Юби онкомед” хавдрын эмнэлэг нь ХСҮТ-ийн хашаан дотор байрладаг. Ингэхдээ бүр, ХСҮТ-ийн баруун хаалга буюу Яаралтай тусламжийн тасгийн хаалганаас тавхан алхмын зайд “Юби онкомед” эмнэлэг нь байрладаг. Хавдартай хүн ХСҮТ дээр очиход оочер дараалал их байвал хажууханд нь “Юби онкомед” хавдрын эмнэлгийн хаалга онгорхой байж байдаг гэсэн үг. Өөрөөр бол, Ц.Уранчимэг хавдартай өвчтнүүдийг ХСҮТ-тэй хэрхэн “хуваалцах”-аа тун нарийн тооцоолжээ.

Тайлбар: ХСҮТ ба "Юби онкомед" эмнэлгийн хаалга

Хоёрдугаарт, ХСҮТ-өөс тавхан алхмын зайтай, хаяа залгаа “Юби онкомед” эмнэлэг нь ХСҮТ-ийн хамгийн туршлагатай эмч, сувилагч нарыг “урвуулан” авч ажиллуулж буй ажээ. Жишээ нь, ХСҮТ-ийн Дэд захирлаар ажиллаж байсан Л.Баярсайхан одоо “Юби онкомед” эмнэлэгт Их эмчээр ажилладаг юм байна. Мөн ХСҮТ-д 20 гаруй жил ажилласан, хамгийн туршлагатай сувилагч нарынх нь нэг У.Ариунаа одоо “Юби онкомед” эмнэлэгт ажилладаг юм байна. Гэх мэтээр. Өөрөөр хэлбэл, ХСҮТ-ийн Дэд захирал Ц.Уранчимэг ХСҮТ-ийнхээ хамгийн туршлагатай эмч, сувилагч нарыг хувийнхаа “Юби онкомел” хавдрын эмнэлэг рүү “урвуулдаг” байж болзошгүй аж.

Тайлбар: "Юби онкомед" хавдрын эмнэлгийн эзэн Э.Баясгалан, их эмч Л.Баярсайхан

Гуравдугаарт, Ц.Уранчимэг нь хувийнхаа хавдрын эмнэлгийг удирдахгүй, яагаад ХСҮТ-ийн Дэд захирлын сэнтийд суугаад байгаа вэ гэдэг асуултад хариулт хайхгүй орхиж болохгүй. Судалж үзвэл, Ц.Уранчимэгийн “Юби онкомед” эмнэлэг нь ХСҮТ-тэй яг адилхан буюу хавдрын бүх төрлийн үзлэг, оношилгоо, эмчилгээ, үйлчилгээг үзүүлдэг юм байна. Тухайлбал, “Юби онкомед” эмнэлэг нь бүх төрлийн эхо үзлэг, ходоод, хөх, улаан хоолой, бүдүүн гэдэс, элэг, уушги, умайн хүзүүний хавдрын урьдчилан сэргийлэх үзлэг, оношилгоо, эрт илрүүлэг, хожуу үеийн хавдрын хөнгөвчлөх эмчилгээ, хими, туяа эмчилгээний хордлого тайлах эмчилгээ гээд хортой, хоргүй хавдартай холбоотой бүх төрлийн үзлэг, эмчилгээг үзүүлдэг ажээ. Тэгээд болоогүй, “Юби онкомед” эмнэлэг нь эмэгтэйчүүдийн умайн хүзүүний хорт хавдрын оношилгоо, эмчилгээгээр дагнасан, хамгийн сүүлийн үеийн тоног төхөөрөмжтэй эмнэлэг гэж өөрсдийгөө сурталчилдаг ажээ. Тэгэхээр Ц.Уранчимэг ХСҮТ-ийн Дэд захирлын албан тушаалаа ашиглан, ХСҮТ-д үзүүлэхээр ирсэн хавдвартай өвчтнүүдээс төлбөрийн чадвартайг нь сонгон хувийнхаа “Юби онкомед” эмнэлэг рүү явуулдаг байж болзошгүй гэсэн үг юм.

Бид дараагийн дугаартаа ХСҮТ-ийн Дэд захирал Ц.Уранчимэгийн хамаатнууд ХСҮТ тэргүүтэй улсын эмнэлгүүдийн эм, эмнэлгийн хэрэгслийн тендерүүдэд хэрхэн ноёлж буйг баримтаар дэлгэх болно.