Улаанбаатар хотын утаагаар буюу “Тавантолгой түлш” ХХК-ийг тойглож, түшиглэж хөлжигсдийг бид цувралаар танилцуулж буй. Өмнөх дугаартаа Байгаль орчны сайд асан Д.Оюунхоролын нөхөр Г.Жаргалсайханы “Гарааны баргил тех” ХХК сүүлийн хоёр жил “Тавантолгой түлш” ХХК-д барьцалдуулагч нийлүүлж, нийт 55.2 тэрбум төгрөг халаасалсан баримтыг дугаартаа дэлгэсэн.
Тэгвэл энэ оны хоёрдугаар сараас Д.Оюунхоролын “Гарааны баргил тех” ХХК-тай дөрөө харшуулан, “Тавантолгой түлш” ХХК-д барьцалдуулагч “шахдаг” бас нэгэн компани гарч ирсэн нь “Хангайхан өндөр” ХХК. Тодруулбал, “Тавантолгой түлш” ХХК-ийн данснаас “Хангайхан өндөр” ХХК-ийн данс руу энэ оны хоёрдугаар сараас эхлэн өнгөрсөн 10 сарын хугацаанд нийт 7.1 тэрбум төгрөгийг “Барьцалдуулагчийн төлбөр” утгаар шилжүүлсэн байна.
Тухайлбал,
Хоёрдугаар сард- 775 сая төгрөг, 20.2 сая төгрөг
Гуравдугаар сард- 772 сая төгрөг, 772 сая төгрөг
Дөрөвдүгээр сард- 1.5 тэрбум төгрөг
Тавдугаар сард- 657.3 сая төгрөг, 788.1 сая төгрөг
Зургадугаар сард- 500 сая төгрөг, 500 сая төгрөг
Наймдугаар сард- 843 сая төгрөг тус тус шилжүүлсэн.
Нийт 7.1 тэрбум төгрөг
Тэгвэл “Тавантолгой түлш” ХХК-д 7.1 тэрбум төгрөгийн барьцалдуулагч нийлүүлсэн “Хангайхан өндөр” ХХК-ийг Юмдоржийн Идэрцогт эзэмшдэг. Ю.Идэрцогтын тухайд, АН-ын гишүүн, Нийслэлийн Багахангай дүүргийн АН-ын даргаар ажиллаж байсан. 2004 оны НИТХ-ын сонгуульд Багахангай дүүргээсээ нэр дэвшээд унасан. Гэсэн ч “Монгол шуудан” ХК-ийн гүйцэтгэх захирлаар томилогдож байв. Дараа нь, 2012 оны УИХ-ын сонгуульд АН-аас нэр дэвшихээр яригдаж байсан ч бүтэлгүйтсэн. Аз болж, 2012 онд АН үнэмлэхүй ялж, улмаар Э.Бат-Үүлийг Хотын дарга байх хугацаанд буюу 2012-2015 оныг дуустал Ю.Идэрцогт Нийслэлийн худалдан авах ажиллагааны газрын даргаар ажилласан. Өөрөөр бол, АН-ыг засаглах хугацаанд хотын тендерүүдийг Ю.Идэрцогт бүхэлд нь хариуцсан. Үргэлжлүүлэн, 2015-2016 онд Гарьдхүүгийн Баярсайханыг Хөдөлмөрийн сайд байх үед Ю.Идэрцогт Хөдөлмөрийн яамны Төрийн нарийн бичгийн даргаар ажиллаж, АН-ынхаа ач буяныг хүртэж амжсан нэгэн. Сүүлд, 2019 онд Лу.Гантөмөр АН-ын дэргэдэх “МоАН фракц”-ын тэргүүн болж, “МоАН фракц”-ынхаа Ерөнхий нарийн бичгийн даргаараа Ю.Идэрцогтыг сонгож байлаа.
Харин Ю.Идэрцогтын эхнэр Пэрэнлэйн Сайнбилэг нь Ц.Элбэгдоржийг Ерөнхийлөгч байх үед Хэвлэлийн албаны даргаар нь ажиллаж байсан. Өдгөө П.Сайнбилэг “Голомт”-ын Д.Баясгалангийн эзэмшдэг “Ийгл” телевиз буюу “Ийгл бродкастинг” ХХК, “Монгол медиа корперэшн” ХХК-иудын гүйцэтгэх захирлаар ажилладаг.
Нэгтгэж харвал, “Хангайхан өндөр” ХХК-ийг эзэмшигч Ю.Идэрцогт ч, эхнэр П.Сайнбилэг нь ч Ц.Элбэгдорж, Э.Бат-Үүл, Лу.Гантөмөр, “Голомт”-ын Д.Баясгалан тэргүүтэй АН-ын томчуудтай тун ойр харилцаатай нь төвөггүй ойлгогдож байгаа биз ээ. Мөн дээр дурдсанчлан, Ю.Идэрцогт өөрөө ч АН-ын засагласан дөрвөн жил Нийслэлийн худалдан авах ажиллагааны газрын дарга, Хөдөлмөрийн яамны Төрийн нарийн бичгийн даргын сэнтийд сууж байсан, АН-д нөлөөтэй хүн. Тэгэхээр хэн хүссэн нь “Тавантолгой түлш” ХХК-ийн нийлүүлэгч болдоггүй, харин төрд өндөр албан тушаал хашиж байсан, АН, МАН-ын аль нэгэнд нөлөөтэй хүн л нийлүүлэгч болж болдгийн бас нэгэн жишээ нь Ю.Идэрцогтын “Хангайхан өндөр” ХХК ажээ.
Ergelt.mn
