Дэлхийн өнцөг булан бүр, эх орныхоо дөрвөн зүг, найман зовхист аж төрөн суугаа элэг нэгт монгол ахан дүүстээ шинэ оны мэнд дэвшүүлье.

Улиран одож буй 2024 онд

Авлига, ашиг сонирхол дунд 30 шахам жил гацсан, улс орныг хөгжилд хөтлөх томоохон төслүүдээ урагшлуулсан, эрх зүйн орчныг нь шинэчлэхдээ түмэн олныхоо шударга хараа хяналтыг тогтооход онцлон анхаарч ажиллалаа.

E-Mongolia платформоор дамжуулан баялагтаа эзэн монгол хүн эх орныхоо баялгийн өгөөжөө алган дээрээсээ шууд хардаг, хянадаг эрүүл, ил нээлттэй тогтолцооны эх үндсийг цутгаж чадлаа.

Төрийн болон орон нутгийн өмчийн тухай хуульд нэмэлт, өөрчлөлт оруулж "Зарлага нь захирлын урамшуулал" болсон төрийн өмчит компаниудын алдагдал, ашгийн мэдээллийг soe.gov.mn-д байршуулан, хэн бүхний өмнө шилэн нээлттэй болголоо.

Өр төлбөрт орсон, үйл ажиллагаа нь доголдсон төрийн өмчит компаниудыг татан буулгаж, нэгтгэлээ.

Салбарын сайд, агентлагийн дарга нар элдэв дам үг, хийсвэр төсөөлөлд бус их өгөгдөл, хиймэл оюун ухаанаар боловсруулан бүрэн дүүрэн мэдээлэлд тулгуурлаж, дүн шинжилгээ хийж, шинжлэх ухаанд үндэслэн шийдвэр гаргах боломжийг нээлээ.

"Монгол хүн Монголын баялаг " гэж бодож сэтгэн түмэн олноо эрүүл, боловсролтой, чинээлэг, баялагтаа эзэн болгохын төлөө хичээн ажилласан он байлаа.

Айлчлан ирж буй 2025 он Л.Оюун-Эрдэнийн Засгийн газар мега төслүүд, эрх зүйн реформуудаа үр дүнтэй хэрэгжүүлж, эдийн засгаа солонгоруулсан, үндэсний эв нэгдлийг эрхэмлэн, улс орноороо өөдөө тэмүүлсэн, монгол хүн, монгол айл бүрийн аж амьдрал дээшилсэн өрнүүн жил байх болно.

Та бүхэндээ ирж буй 2025 ондоо эрүүл энх, саруул сайхан, ажил хөдөлмөр нь амжилт, бүтээлээр арвин, амьдрал нь аз жаргалаар дүүрэн байхын өлзийтэй сайхан ерөөлийг өөд өөд нь өргөн дэвшүүлье.

Хүндэтгэсэн

УИХ-ын гишүүн, Монгол Улсын сайд, ЗГХЭГ-ын дарга Ням-Осорын УЧРАЛ